روس،ڈوپنگ اسکینڈل کی تحقیقات مکمل، 300سے زائد پابندیاں عائد

واڈا کے صدر وٹولڈ بانکا نے اس تحقیقات کو تاریخ کی کامیاب ترین کارروائی قرار دیا

جمعہ 1 مئی 2026 14:50

ماسکو(اُردو پوائنٹ اخبارتازہ ترین - این این آئی۔ 01 مئی2026ء) عالمی انسداد ڈوپنگ ادارے ورلڈ اینٹی ڈوپنگ ایجنسی (واڈا)نے اعلان کیا ہے کہ ماسکو لیبارٹری کے ڈیٹا کے حصول کے بعد ہونے والی تحقیقات کامیابی سے مکمل کر لی گئی ہیں۔آپریشن لمز کے نام سے جاری تحقیقات کے نتیجے میں 291روسی کھلاڑیوں کو سزا دی گئی جبکہ مجموعی طور پر 302پابندیاں عائد کی گئیں۔

رپورٹ کے مطابق 22مختلف کھیلوں سے تعلق رکھنے والے ایتھلیٹس کو 23اینٹی ڈوپنگ تنظیموں نے سزائیں سنائیں۔

(جاری ہے)

ان میں ویٹ لفٹنگ اور ایتھلیٹکس کے کھلاڑی سب سے زیادہ متاثر ہوئے۔مزید یہ کہ 11کھلاڑیوں کو ایک سے زائد خلاف ورزیوں پر سزا دی گئی جبکہ چار کیسز ابھی زیر سماعت ہیں۔واڈا کے صدر وٹولڈ بانکا نے اس تحقیقات کو تاریخ کی کامیاب ترین کارروائی قرار دیا ہے۔یاد رہے کہ 2015میں روس میں ریاستی سرپرستی میں ڈوپنگ پروگرام کا انکشاف ہوا تھا جس کے بعد روسی اینٹی ڈوپنگ ایجنسی کو معطل کر دیا گیا تھا۔بعد ازاں 2018میں سخت شرائط کے تحت اس کی بحالی کی گئی جس کے نتیجے میں 2019میں ماسکو لیب سے اہم ڈیٹا حاصل ہوا۔اسی ڈیٹا میں رد و بدل ثابت ہونے پر روس پر چار سالہ پابندی بھی عائد کی گئی تھی۔