پاکستان سپر لیگ 11 کا فائنل آج کھیلا جائے گا

مارنس لبوشین کی حیدرآباد کنگز مین اور بابر اعظم کی پشاور زلمی آمنے سامنے

اتوار 3 مئی 2026 11:42

پاکستان سپر لیگ 11 کا فائنل آج کھیلا جائے گا

لاہور (اُردو پوائنٹ اخبارتازہ ترین - اے پی پی۔ 03 مئی2026ء) ایچ بی ایل پاکستان سپر لیگ11 کا فائنل(آج)اتوار کی شب قذافی اسٹیڈیم لاہور میں کھیلا جائے گا،جہاں مارنس لبوشین کی حیدرآباد کنگز مین اور بابر اعظم کی پشاور زلمی آمنے سامنے ہوں گی۔44 میچز پر مشتمل ٹورنامنٹ اپنے اختتام کو پہنچے گا۔شائقینِ کرکٹ کو ہدایت کی گئی ہے کہ وہ شام6 بجے تک اسٹیڈیم پہنچ جائیں جبکہ اختتامی تقریب ساڑھے6 بجے شروع ہو گی۔

ایچ بی ایل پی ایس ایل کی تاریخ میں پہلی بار فرنچائزز کے لیے علیحدہ انعامات کا اعلان کیا گیا ہے۔فاتح ٹیم کو5 لاکھ امریکی ڈالر،رنر اپ کو3 لاکھ امریکی ڈالر جبکہ بہترین پلیئر ڈویلپمنٹ کرنے والی فرنچائز کو2 لاکھ امریکی ڈالر دیئے جائیں گے۔کھلاڑیوں کے لیے جیتنے والی ٹیم کا انعام بھی5 لاکھ امریکی ڈالر ہوگا۔

(جاری ہے)

حیدرآباد کنگز مین اپنی پہلی ہی سیزن میں شاندار کارکردگی کے بعد ٹائٹل جیتنے کے لیے پرعزم ہیں جبکہ پشاور زلمی2017 کے بعد دوسری مرتبہ چیمپیئن بننے کی خواہاں ہے۔

زلمی 2018،2019 اور2021 میں رنر اپ رہ چکی ہے۔پشاور زلمی نے لیگ مرحلے میں10 میں سے8 میچز جیتے،جن میں مسلسل7 فتوحات بھی شامل تھیں۔بابر اعظم نے588 رنز، کوشل مینڈس نے541 رنز جبکہ سفیان مقیم نے21 وکٹیں حاصل کیں۔زلمی نے28 اپریل کو کوالیفائر میں اسلام آباد یونائیٹڈ کو70 رنز سے شکست دیکر فائنل میں جگہ بنائی۔ایکسپریس فاسٹ بولر ناہید رانا بھی دوبارہ اسکواڈ میں شامل ہو گئے ہیں اور سلیکشن کے لیے دستیاب ہوں گے۔

انہوں نے لیگ مرحلے میں4 میچز میں7 وکٹیں حاصل کیں۔دوسری جانب حیدرآباد کنگز مین نے ٹورنامنٹ کا آغاز مسلسل تین شکستوں سے کیا اور چوتھا میچ بھی پشاور زلمی کے خلاف آخری گیند پر ہار گئے۔تاہم اس کے بعد انہوں نے شاندار کم بیک کرتے ہوئے مسلسل چار میچز جیتے۔آخری لیگ میچ میں انہوں نے راولپنڈی کو 108 رنز سے شکست دیکر دفاعی چیمپئن لاہور قلندرز کو نیٹ رن ریٹ پر باہر کیا۔

بعد ازاں انہوں نے ایلیمینیٹر1 میں ملتان سلطانز اور ایلیمینیٹر2 میں اسلام آباد یونائیٹڈ کو شکست دیکر فائنل تک رسائی حاصل کی۔فائنل سے قبل پریس کانفرنس میں بابر اعظم کا کہنا تھا کہ ٹیم نے پورے ٹورنامنٹ میں بہترین کرکٹ کھیلی اور مقامی و غیر ملکی کھلاڑیوں نے مشترکہ طور پر عمدہ کارکردگی دکھائی۔انہوں نے امید ظاہر کی کہ ٹیم بہترین کھیل پیش کرتے ہوئے ٹرافی جیتے گی۔مارنس لبوشین کا کہنا تھا کہ ٹیم کی قیادت ایک شاندار تجربہ رہا،اتار چڑھائو کے باوجود کھلاڑیوں نے اچھا کھیل پیش کیا۔ان کے مطابق فائنل ایک اور میچ ہے اور ٹیم اپنی حکمت عملی پر عمل کرے گی۔