ڈسٹرکٹ پولیس بدین نے جرائم پیشہ عناصر کے خلاف جاری ٹارگٹڈ کارروائیوں کے دوران 5 روپوش سمیت 12 ملزمان کو گرفتار کرلیا

جمعہ 1 مئی 2026 23:10

پنگریو (اُردو پوائنٹ اخبارتازہ ترین - این این آئی۔ 01 مئی2026ء) ڈسٹرکٹ پولیس بدین نے جرائم پیشہ عناصر کے خلاف جاری ٹارگٹڈ کارروائیوں کے دوران 5 روپوش سمیت 12 ملزمان کو گرفتار کرلیا۔ کارروائیوں کے دوران غیر قانونی اسلحہ، آئس، 404 لیٹرز دیسی شراب اور 240 گٹکے بھی برآمد کیے گئے۔ ڈی آئی جی حیدرآباد رینج طارق رزاق دھاریجو اور ایس ایس پی بدین قمر رضا جسکانی کی ہدایات پر پولیس نے مختلف تھانوں کی حدود میں کامیاب کارروائیاں کیں۔

تفصیلات کے مطابق تھانہ بدین کے ایس ایچ او سب انسپکٹر علاول خاصخیلی نے ڈکیتی، چوری اور منشیات کے مقدمات میں مطلوب ملزم محمد امین سومرو کو گرفتار کرکے اس کے قبضے سے ایک ٹی ٹی پستول اور 4 گولیاں برآمد کرلیں۔ اسی تھانے کی مزید کارروائیوں میں آئس فروش کاشف راجپوت سے 2 گرام آئس اور گٹکہ فروش ندیم ملاح سے 240 گٹکے برآمد کیے گئے۔

(جاری ہے)

تھانہ شہید فاضل راہو کے ایس ایچ او انسپکٹر محمد انور لغاری نے دیسی شراب کی بٹھی پر چھاپہ مار کر 250 لیٹرز شراب برآمد کرتے ہوئے ملزمان الطاف حسین اور محمد خان کو گرفتار کیا۔

تھانہ ٹنڈوباگو کے ایس ایچ او انسپکٹر اصغر عالم ہالیپوٹو نے آئس فروش جمن عمرانی کو 9 گرام آئس سمیت گرفتار کیا جبکہ ایک روپوش ملزم موہن کولہی کو بھی حراست میں لیا۔ تھانہ گلاب لغاری کے ایس ایچ او انسپکٹر فیاض علی برڑو نے کارروائی کرتے ہوئے تین روپوش ملزمان شاکر علی چانڈیو، عرفان علی سموں اور جمن عرف کارو چانڈیو کو گرفتار کیا۔ تھانہ ٹنڈو غلام علی کے ایس ایچ او انسپکٹر ایاز علی بھٹی نے دیسی شراب کی بٹھی پر چھاپہ مار کر 154 لیٹرز شراب برآمد کی اور ملزم راجو کولہی کو گرفتار کیا۔

تھانہ کھوسکی کے سب انسپکٹر رمیز حیدر نے کارروائی کرتے ہوئے روپوش ملزم نور حسن نوتیار کو گرفتار کرلیا۔ پولیس کے مطابق گرفتار ملزمان کے خلاف مقدمات درج کرکے مزید تفتیش کا آغاز کردیا گیا ہے جبکہ جرائم پیشہ عناصر کے خلاف کارروائیاں جاری رہیں گی۔