بی جے پی حکومت ذات پر مبنی مردم شماری میں دانستہ طور پر تاخیر کر رہی ہے، کانگریس

جمعہ 1 مئی 2026 21:07

نئی دلی (اُردو پوائنٹ اخبارتازہ ترین - اے پی پی۔ 01 مئی2026ء) کانگریس نے کہا ہے کہ بی جے پی کی حکومت ذات پرمبنی مردم شماری میں دانستہ طور پر تاخیر اور اس حوالے سے کوئی واضح پیش رفت نہیں کررہی ہے ۔کشمیر میڈیاسروس کے مطابق کانگریس کے جنرل سیکرٹری جئے رام رمیش نے کہا ہے کہ حکومت نے مردم شماری کے عمل اور اس کے طریقہ کار کے بارے میں اب تک کوئی وضاحت نہیں کی ہے۔

انہوں نے نشاندہی کی کہ حکومت گزشتہ ایک برس سے اس معاملہ پر خاموش ہے اور اس حوالے سے غیر ضروری تاخیر کر رہی ہے ۔

(جاری ہے)

انہوں نے یاد دہانی کرائی کہ کانگریس کے صدر ملکار جن کھرگے نے 16اپریل 2023کو وزیر اعظم نریندر مودی کو خط لکھ کر مردم شماری میں ذات پات کے اعداد و شمار شامل کرنے کا مطالبہ کیا تھا لیکن آج تک اس خط کا کوئی جواب نہیں دیا گیا۔انہوں نے کہا کہ خط کا جواب دینے کے بجائے وزیر اعظم نے28اپریل 2024کو ایک ٹی وی انٹرویو میں ذات پات پر مبنی مردم شماری کے مطالبے کو ''اربن نکسل سوچ''قرار دیا تھا جس پر انہیں معافی مانگنی چاہیے ۔

جئے رام رمیش نے کہا کہ کانگریس کا موقف ہے کہ ذات پرمبنی مردم شماری معاشرتی اور معاشی انصاف کے لیے ضروری ہے اور اس سے پسماندہ ، محروم اورکمزور طبقات کو انکے حقوق دلانے میں مدد ملے گی ۔