Live Updates

امریکا کا آبنائے ہرمز میں ایرانی بحری جہاز پر حملہ

امریکی حملے میں ایرانی بحری جہاز پر موجود متعدد افراد کے نشانہ بن جانے کی اطلاعات

محمد علی جمعہ 8 مئی 2026 20:39

تہران (اُردو پوائنٹ اخبارتازہ ترین۔ 08 مئی2026ء) امریکا کا آبنائے ہرمز میں ایرانی بحری جہاز پر حملہ، امریکی حملے میں ایرانی بحری جہاز پر موجود متعدد افراد کے نشانہ بن جانے کی اطلاعات۔ الجزیرہ ٹی وی کے مطابق آبنائے ہرمز میں امریکی بحریہ نے ایک تجارتی جہاز کو نشانہ بنایا جس پر ایرانی پرچم لہرا رہا تھا، جہاز پر 15 افراد سوار تھے۔ امریکی حملے میں 10 ملاح شدید زخمی ہوگئے جب کہ 5 تاحال لاپتا ہیں۔

امریکی بحریہ نے ایرانی تجارتی جہاز کو اُس وقت نشانہ بنایا جب وہ آبنائے ہرمز اور بحیرہ عمان کے پانیوں پر محو سفر تھا۔ حملے کےبعد 10 زخمی افراد کو تو ریسکیو کر لیا گیا، تاہم لاپتہ ہو جانے والے5 افراد کی تلاش جاری ہے۔ آبنائے ہرمز میں حالیہ کشیدگی پر ایران کا ردعمل بھی سامنے آیا ہے۔

(جاری ہے)

ایرانی وزیر خارجہ عباس عراقچی کی تازہ ٹوئٹ میں کہا گیاہے کہ "جب بھی سفارتی طریقے سے معاملات حل کی جانب بڑھتے ہیں تو عین اسی موقع پر امریکا خطرناک فوجی مہم جوئی شروع کردیتا ہے۔

یہ بھونڈی حکمت عملی آیا کسی تخریب کار (اسرائیل) کی کارستانی ہے جو ایک بار پھر امریکی صدر کو ایک نئی دلدل میں دھکیل رہی ہے؟۔ وجہ کچھ بھی ہو نتیجہ ہمیشہ ایک ہی رہے گا اور وہ یہ کہ ایرانی کبھی دباؤ کے آگے جھکتے نہیں ہیں۔" دوسری جانب امریکی وزیرخارجہ مارکو روبیو نے کہا کہ ایران کی طرف سے اب تک ہمیں کوئی جواب موصول نہیں ہوا۔ آج ہمیں ایران کا جواب موصول ہوجانا چاہئے، امید ہے کہ ایران مثبت مذاکرات کی طرف آئے گا۔

امید ہے کہ ایران کی طرف سے سنجیدہ تجاویز سامنے آئیں گی۔ ایران کو کسی بھی صورت جوہری ہتھیار رکھنے کی اجازت نہیں دے سکتے۔ ہماری توجہ صردف لبنانی حکومت پر ہے، حزب اللہ سے مذاکرات نہیں ہوں گے۔ ایران ہم پر میزائل فائر کرے گا تو ہم بھی جواب دیں گے۔انہوں نے کہا کہ ایران کو آبنائے ہرمز کنٹرول کرنے دیا تو کل مزید ممالک سمندری راستے کنٹرول کریں گے۔