سیکرٹری سپورٹس پنجاب فضل الرحمن کی زیر صدارت اہم اجلاس ،محکمانہ امور کا تفصیلی جائزہ لیا گیا

جمعہ 1 مئی 2026 21:08

لاہور (اُردو پوائنٹ اخبارتازہ ترین - اے پی پی۔ 01 مئی2026ء) سیکرٹری سپورٹس پنجاب فضل الرحمن کی زیر صدارت ایک اہم اجلاس منعقد ہوا ۔پنجاب سٹیڈیم میں ہونیوالے اجلاس میں سپورٹس ڈیپارٹمنٹ اور سپورٹس بورڈ پنجاب کے امور کا تفصیلی جائزہ لیا گیا۔پنجاب پبلک پرائیوٹ پارٹنرشپ اتھارٹی کے ساتھ مل کر 100 سپورٹس کمپلیکسز کو آؤٹ سورس کرنے کے حوالے سے حکمت عملی بھی طے کی گئی جبکہ سالانہ سپورٹس کیلنڈر کا بھی تفصیلی جائزہ لیا گیا۔

ڈائریکٹر جنرل سپورٹس پنجاب محمد طارق قریشی نے اجلاس کو بریفنگ دی۔سیکرٹری سپورٹس پنجاب نے اجلاس سے خطاب کرتے ہوئے کہا ہے کہ مئی میں کھیلتا پنجاب پاک چائینہ فرینڈز شپ سمر گیمزکا انعقاد کیا جائے گا جبکہ سالانہ سپورٹس کیلنڈرکے تحت پنجاب میں اتھلیٹکس مقابلے بھی کروائے جائیں گے، نشتر پارک سپورٹس کمپلیکس کے ایلیٹ ٹریننگ سنٹر کو پاک چائینہ فرینڈزشپ سنٹرکا نام دیا جا رہا ہے، پاک چین فرینڈزشپ گیمز کو شاندار انداز میں منعقد کیا جائے گا۔

(جاری ہے)

انہوں نے مزید کہا ہے کہ پنجاب آئندہ ہونیوالی نیشنل گیمز میں پہلی پوزیشن حاصل کرے گا جس کیلئے بھرپور تیاری کی جائے گی، پنجاب میں 41 پیڈل ٹینس کورٹس کی تعمیر جاری ہے، سپورٹس کا فروغ ہمارا مشن ہے اور اس حوالے سے عملی اقدامات اٹھائے جا رہے ہیں،سپورٹس بورڈ پنجاب میں اصلاحات متعارف کروائی جائیں گی۔ سیکرٹری سپورٹس پنجاب فضل الرحمان نے بتایا کہ پنجاب میں سپورٹس ڈیپارٹمنٹ پنجاب کی تمام سپورٹس سہولیات کو آن لائن کر دیا گیا ہے، جس کے ذریعے شہری گھر بیٹھے سپورٹس سہولیات سے متعلق معلومات حاصل کر سکتے ہیں۔

اجلاس میں ایڈیشنل سیکرٹری سپورٹس شبیر حسین چیمہ، ڈائریکٹر ایڈمن عابد شوکت، ڈائریکٹر سپورٹس چاند پروین، ڈائریکٹر یوتھ افیئرز محمد فہداور ڈپٹی ڈائریکٹر ظہور احمد ودیگر بھی موجود تھے۔