زاید چیریٹی رن کے تمام انتظامات مکمل ، آئندہ اتوار کو ایتھوپیا کے میسکل سکوائر میں ہوگا

ہفتہ 2 مئی 2026 10:32

ادیس ابابا (اُردو پوائنٹ اخبارتازہ ترین - اے پی پی۔ 02 مئی2026ء) زاید چیریٹی رن کی آرگنائزنگ کمیٹی نے اعلان کیا ہے کہ عالمی سطح کے اس ایونٹ کے تمام انتظامات مکمل کر لیے گئے ہیں، جو آئندہ اتوار کو میسکل سکوائر میں منعقد ہوگا۔ اماراتی نیوز ایجنسی وام کے مطابق یہ اعلان ایتھوپیا کے دارالحکومت ادیس ابابا میں ایک مقامی ہوٹل میں منعقدہ پریس کانفرنس کے دوران کیا گیا، جس میں متحدہ عرب امارات کے ایتھوپیا میں سفیر محمد سالم الراشدی، سپریم آرگنائزنگ کمیٹی کے چیئرمین لیفٹیننٹ جنرل (ر) محمد ہلال الکعبی، ہلال احمر امارات کے سیکرٹری جنرل احمد سری المزروعی اور ایتھوپیا کے وزیر مملکت برائے کھیلوں کی ترقی میکیو محمد ابادیگا نے شرکت کی۔

متحدہ عرب امارات کے العیالہ ثقافتی گروپ نے بھی دبئی سے آ کر روایتی ثقافتی مظاہرے پیش کیے، جنہیں حاضرین نے بھرپور سراہا۔

(جاری ہے)

محمد ہلال الکعبی نے کہا کہ زاید چیریٹی رن صرف ایک کھیلوں کا ایونٹ نہیں بلکہ ایک عالمی انسانی ہمدردی کا پلیٹ فارم ہے، جو متحدہ عرب امارات کے بانی شیخ زاید بن سلطان النہیان کے وژن سے متاثر ہے۔ انہوں نے کہا کہ ایتھوپیا میں اس ایونٹ کا انعقاد امارات کے جذبہ خیرات اور انسان دوستی کے فروغ کے عزم کی عکاسی کرتا ہے، اور یہ سلسلہ 2001میں آغاز کے بعد سے کئی ممالک تک پھیل چکا ہے۔

انہوں نے کہا کہ متحدہ عرب امارات سے پچاس رنرز سمیت شرکاکی شرکت’’وی رن فار گیوینگ ‘‘کے نعرے کے تحت اتحاد اور تنوع کی عکاسی کرتی ہے، اور مختلف کمیونٹیز کو انسانیت کی خدمت کے لیے اکٹھا ہونے کی ترغیب دیتی ہے۔انہوں نے توقع ظاہر کی کہ عوام کی بھرپور شرکت کے ساتھ یہ ایونٹ ایک اور کامیاب مرحلہ ثابت ہوگا اور دنیا بھر میں مریضوں کی مدد کے مشن کو مزید مضبوط کرے گا۔

احمد سری المزروعی نے اعلان کیا کہ ایتھوپیا میں بچوں کے دل کے ہسپتالوں کے لیے تین لاکھ ڈالر کی مالی امداد فراہم کی جائے گی، اور صحت کے شعبے میں تعاون جاری رکھنے کے عزم کا اعادہ کیا۔ انہوں نے کہا کہ یہ رن ایک پائیدار انسانی ماڈل کی نمائندگی کرتا ہے جو تعاون کو فروغ دیتا ہے اور معاشروں پر مثبت اثرات مرتب کرتا ہے۔میکیو محمد ابادیگا نے ادیس ابابا میں پہلی بار اس ایونٹ کے انعقاد کا خیرمقدم کیا اور اس کی انسان دوست اہمیت کو اجاگر کرتے ہوئے اماراتی اداروں کے ساتھ تعاون کو سراہا۔ انہوں نے کہا کہ یہ اقدام مختلف عمر کے افراد کی شمولیت کو ظاہر کرتا ہے اور دونوں ممالک کے درمیان کھیلوں کے شعبے میں تعاون کو مضبوط بناتا ہے۔ ■