ٹیم فائنل میچ میں منصوبہ بندی کے ساتھ میدان میں اترے گی ، فاسٹ بائولر حنین شاہ

ہفتہ 2 مئی 2026 11:19

لاہور (اُردو پوائنٹ اخبارتازہ ترین - اے پی پی۔ 02 مئی2026ء) پی ایس ایل کے ایلیمینیٹر میچ میں بہترین کارکردگی کا مظاہرہ کرکے اپنی ٹیم کو فائنل میں پہنچانے والے حیدر آباد گنگزمین کے فاسٹ بائولر حنین شاہ نے کہا ہے کہ ٹیم نے ان پر جن توقعات کا اظہار کیا تھا وہ ان پر پورا اترے اور فائنل میں بھی اچھی پرفارمنس کا مظاہرہ کریں گے۔اپنی کارکردگی اور تیاری کے حوالے سے گفتگو کرتے ہوئے انہوں نے کہا کہ انہیں اپنے اوپر مکمل یقین تھا کہ وہ پلان کے مطابق بائولنگ کر سکتے ہیں۔

انہوں نے کہا کہ کامیابی یا ناکامی اللہ تعالی کے ہاتھ میں ہوتی ہے،تاہم انہوں نے اپنی جانب سے بھرپور کوشش کی۔حنین شاہ نے کہا کہ کراڈ کا کردار بہت اہم ہوتا ہے اور شائقین کے سامنے کھیل کر کھلاڑیوں کو حوصلہ ملتا ہے۔

(جاری ہے)

انہوں نے بتایا کہ گزشتہ6 سے7 ماہ سے وہ پی ایس ایل کو ذہن میں رکھتے ہوئے مسلسل محنت کر رہے تھے اور ان کا مقصد یہی تھا کہ موقع ملنے پر بہترین کارکردگی دکھائیں۔

حنین شاہ نے نسیم شاہ کا ذکر کرتے ہوئے کہا کہ انہوں نے مشکل وقت میں بہت مدد کی۔ کپتان کے ساتھ گفتگو کے حوالے سے انہوں نے کہا کہ زیادہ بات نہیں ہوئی،البتہ ان کے ذہن میں واضح پلان تھا کہ چھ یارکرز کرنی ہیں۔حنین شاہ نے کوچ جیسن گلیسپی کی تربیت کا ذکر کرتے ہوئے کہا کہ انہوں نے سکھایا ہے کہ گیند کرنے سے پہلے ذہن میں مکمل واضح منصوبہ ہونا چاہیے،کیونکہ اچھی کارکردگی کے لیے کلیرٹی بے حد ضروری ہے۔

انہوں نے کہا کہ ان کی توجہ اپنی بہترین باولنگ پر مرکوز رہے گی جبکہ ٹیم کے حوالے سے بات کرتے ہوئے انہوں نے کہا کہ سکواڈ میں شامل تمام کھلاڑی مختلف مواقع پر پرفارم کر رہے ہیں،جس سے ٹیم مضبوط بنتی ہے۔انہوں نے کہا کہ جب ٹیم میں کئی میچ ونرز موجود ہوں تو مخالف ٹیم کے لیے حکمت عملی بنانا مشکل ہو جاتا ہے۔آخر میں انہوں نے اس عزم کا اظہار کیا کہ ٹیم فائنل میں بھی واضح منصوبہ بندی کے ساتھ میدان میں اترے گی اور کامیابی کے لیے بھرپور کوشش کرے گی۔