یوٹیوبر رجب بٹ کا اب فیشن انفلوئنسر لاریب ملک کے ساتھ تنازعہ سامنے آگیا

میرے ایک میسج نے ایک عورت ذات کو مشہور کردیا، پہلے سب مزے لے لیں، تنقید کرلیں، پھر میں بتاؤں گا کہ اس کے پیچھے اصل کہانی کیا ہے؛ رجب بٹ کی طنزیہ پوسٹ

ساجد علی ہفتہ 2 مئی 2026 16:39

یوٹیوبر رجب بٹ کا اب فیشن انفلوئنسر لاریب ملک کے ساتھ تنازعہ سامنے ..

لاہور (اُردو پوائنٹ اخبارتازہ ترین۔ 02 مئی2026ء) معروف یوٹیوبر رجب بٹ جو پہلے ہی اپنی نجی زندگی اور طلاق کے معاملات کی وجہ سے سرخیوں میں تھے، اب ایک نئے سوشل میڈیا تنازعہ کی زد میں آگئے ہیں، اس بار معاملہ فیشن انفلوئنسر لاریب ملک کے ساتھ ان کی مبینہ چیٹ اور اس کے بعد آنے والے بیانات کا ہے۔ تفصیلات کے مطابق یوٹیوبر رجب بٹ ایک بار پھر سوشل میڈیا پر تنقید کا نشانہ بن رہے ہیں، تازہ ترین تنازعہ اس وقت شروع ہوا جب لائف اسٹائل انفلوئنسر لاریب ملک نے رجب بٹ کی جانب سے بھیجے گئے پیغامات کو پبلک کردیا، لاریب ملک نے اپنے انسٹاگرام اکاؤنٹ پر ایک سٹوری شیئر کی جس میں دکھایا گیا کہ رجب بٹ نے انہیں پیغام بھیج کر خود کو ان کا 'بڑا مداح' (Big Fan) قرار دیا تھا، لاریب نے اس پیغام کا جواب دینے کے بجائے رجب بٹ کو فوری طور پر بلاک کر دیا اور اس کا اسکرین شاٹ شیئر کرتے ہوئے واضح کیا کہ وہ ایسے پیغامات میں کوئی دلچسپی نہیں رکھتیں۔

(جاری ہے)

عام طور پر ایسی صورتحال میں لوگ خاموشی اختیار کرتے ہیں یا معذرت کرلیتے ہیں لیکن رجب بٹ نے ایک متنازعہ مؤقف اپنایا، انہوں نے اپنے بیان میں ندامت کا اظہار کرنے کے بجائے کہا کہ "مجھے فخر ہے کہ میرے ایک میسج نے ایک ایسی عورت کو مشہور کر دیا جسے پچھلے تین سال سے کوئی جانتا تک نہیں تھا"، رجب بٹ نے مزید کہا کہ وہ فی الحال لوگوں کی تنقید اور مزے لینے کا انتظار کر رہے ہیں، جس کے بعد وہ اس پوری کہانی کے پیچھے چھپا اصل سچ سامنے لائیں گے۔