آسٹریلیا میں بچوں کو موٹاپے سے بچانے کے دس سالہ پروگرام پر عملدرآمد شروع

وکٹوریا اور ویسٹرن آسٹریلیامیں 60ہزار بچوں اور ان کے والدین پر توجہ مرکوز کی جائے گی،رپورٹ

پیر 4 مئی 2026 19:00

میلبورن(اُردو پوائنٹ اخبارتازہ ترین - این این آئی۔ 04 مئی2026ء) آسٹریلیا میں بچوں کو موٹاپے سے بچانے کے دس سالہ پروگرام پر عملدرآمد کا آغاز کر دیا گیا ہے۔اس پروگرام کے تحت آسٹریلیاکی دو ریاستوں وکٹوریا اور ویسٹرن آسٹریلیامیں 60ہزار بچوں اور ان کے والدین پر توجہ مرکوز کی جائے گی اور اس میں آسٹریلیا کی متعدد ریاستوں میں قائم معروف یونیورسٹیاں اور تحقیقی ادارے حصہ لے رہے ہیں۔

عرب ٹی وی کے مطابق آسٹریلیا میں بچوں کی صحت کے ماہرین نے بچپن میں موٹاپے کی شرح میں اضافے سے نمٹنے کے لیے قومی سطح پر مربوط، کثیر الجہتی حکمت عملی کی نقاب کشائی کی ہے، جس کا ہدف دل کی صحت، خوراک، ورزش اور نیند ہے۔یہ اقدام، جسے GenHEART کا نام دیا گیا ہے ،کی قیادت آسٹریلیا کا مرڈوک چلڈرن ریسرچ انسٹی ٹیوٹ کر رہاہے۔

(جاری ہے)

10 سال تک جاری رہنے والے اس پروگرام کا مقصد بچوں اور ان کے والدین میں موٹاپے کے خطرناک رجحانات کو کم کرناہے ۔

اس پروگرام میں دو طویل مدتی ہمہ گیر مطالعات کو یکجا کیا گیا ہے ۔ایم سی آر آئی کی پروفیسر میلیسا ویک جو اس پروگرام کی نگرانی میں معاونت کریں گی ،نے کہا ہے کہ بچپن میں دل کی اچھی صحت کسی شخص کی زندگی بھر میں دائمی بیماری کے خطرے کو کم کرنے کے لیے بہت ضروری ہے۔ پروگرام میں اس بات کا جائزہ لیا جائے گا کہ کیا رات کو جلدی سونے ، والدین کی طرف سے وزن میں کمی کیاقدا مات، سکول میں بلڈ پریشر کی سکریننگ اور جسم کوتوانا بنانے والی جسمانی سرگرمیاں بچوں کی طویل مدتی صحت کے نتائج کو بہتر بنا سکتی ہیں۔

پروفیسر میلیسا ویک نے کہا کہ ہم کارڈیو میٹابولک امراض کے خطرے کے عوامل جانتے ہیں یعنی یہ کہ وزن میں غیر صحت بخش اضافہ، ہائی بلڈ پریشر، کم جسمانی سرگرمی اور کم نیند اکثر پرائمری سکول کے دور میں شروع ہوتی ہے ۔انہوں نے کہا کہ یہ اقدام موٹاپے کی بڑھتی ہوئی شرحوں اور متعلقہ دائمی بیماریوں کو کم کرنے کا ایک نادر موقع ہو سکتا ہے جن میں دل کے امراض ، ذیابیطس اور گردے کی بیماریاں شامل ہیں جن پر آسٹریلیا کو سالانہ 23 بلین آسٹریلوی ڈالر (تقریبا 16.54 بلین امریکی ڈالر)سے زیادہ خرچ کرنا پڑتے ہیں۔