عیدالاضحیٰ پر شہریوں کو بہترین سہولیات کی فراہمی اولین ترجیح ہے، کمشنر ملتان

ملتان (اُردو پوائنٹ اخبارتازہ ترین - اے پی پی۔ 06 مئی2026ء) کمشنر ملتان عامر کریم خاں نے کہا ہے کہ عیدالاضحیٰ کے موقع پر شہریوں کو بہترین سہولیات کی فراہمی یقینی بنانا ضلعی انتظامیہ کی اولین ترجیح ہے۔انہوں نے کہاکہ عید کے دوران تمام ادارے متحرک رہیں اور عوام کو ہر ممکن ریلیف فراہم کریں۔ان خیالات کا اظہار انہوں نے عیدالاضحیٰ انتظامات کے حوالے سے منعقدہ جائزہ اجلاس کی صدارت کرتے ہوئے کیا، جس میں ڈپٹی کمشنرز اور متعلقہ محکموں کے افسران نے شرکت کی۔

کمشنر نے ہدایت کی کہ عید کی چھٹیوں کے دوران پبلک ٹرانسپورٹ کے کرایوں کی سخت مانیٹرنگ کی جائے،تمام گاڑیوں کی مکمل انسپکشن یقینی بنائی جائے،فٹنس سرٹیفکیٹس کے اجرا کے لئے سیکرٹری آر ٹی اے کو ذمہ دار قرار دیا گیا ہے۔

(جاری ہے)

انہوں نے مویشی منڈیوں میں اوورچارجنگ پر زیرو ٹالرنس پالیسی اپنانے اور خلاف ورزی پر مقدمات درج کر کے گرفتاریاں یقینی بنانے کا حکم دیا۔

عامر کریم خاں نے ہدایت کی کہ مویشی منڈیوں میں چچڑ مار سپرے کیلئے لائیو سٹاک کیمپس قائم کیے جائیں قربانی کے جانوروں کی آلائشوں کو بروقت ٹھکانے لگانے کےلئے ویسٹ کلیکشن پوائنٹس بنائے جائیں۔انہوں نے ویسٹ مینجمنٹ کمپنی کو سڑکوں کی صفائی اور دھلائی یقینی بنانے کی ہدایت کی۔انہوں نے کہا کہ تمام مویشی منڈیاں اور سیل پوائنٹس یکم ذی الحج سے فعال ہوں گے، ڈپٹی کمشنر دفاتر میں مرکزی کنٹرول رومز بھی قائم کیے جائیں گے۔

سینٹری ورکرز کو کھانے پینے کی سہولیات کی فراہمی اور تنخواہوں کی بروقت ادائیگی بھی یقینی بنائی جائے گی۔کمشنر نے پارکوں اور گرین بیلٹس کی صفائی پر خصوصی توجہ دینے، پارکوں کے باہر ویسٹ کنٹینرز نہ رکھنے، مساجد کی صفائی، پھولوں کے گیٹس کی تنصیب اور راستوں کی آرائش کو یقینی بنانے کی ہدایت کی۔ بازاروں میں تجاوزات کے خلاف کریک ڈاؤن اور راستوں کو کشادہ کرنے کےبھی احکامات جاری کیے گئے۔

انہوں نے سٹریٹ لائٹس، قبرستانوں، بس اڈوں اور ٹرمینلز کی صفائی پر خصوصی توجہ دینے، کینٹینز پر ناقص اشیائے خوردونوش کی فروخت کے خلاف کارروائی اور بس اڈوں و پٹرول پمپس پر صاف پانی کی فراہمی یقینی بنانے کی ہدایت کی۔عامر کریم خاں نے کہا کہ عیدالاضحیٰ کے موقع پر واسا، ویسٹ مینجمنٹ کمپنی، ریسکیو، ہیلتھ اور پی ایچ اے اپنے ڈیوٹی روسٹرز جاری کریں اور فیلڈ میں موجود رہیں۔ شہر کے داخلی و خارجی راستوں کی صفائی اور تزئین و آرائش پر بھی خصوصی توجہ دی جائے۔اجلاس میں کمشنر نے پارکوں میں لگے جھولوں کی انسپکشن، نہروں پر نہانے پر دفعہ 144 کے نفاذ کےلئے حکومت پنجاب کو مراسلہ ارسال کرنے اور مون سون سیزن کو مدنظر رکھتے ہوئے پیشگی انتظامات مکمل کرنے کی بھی ہدایت کی۔