کراچی ،بلاول چورنگی پر وی آئی پی موومنٹ کے خلاف شہری آپے سے باہر ، سوشل میڈیا پر ویڈیو وائرل

بدھ 6 مئی 2026 16:18

کراچی (اُردو پوائنٹ اخبارتازہ ترین - این این آئی۔ 06 مئی2026ء) وی آئی پی کلچر کے خلاف شہری آپے سے باہر ہوگئے، بلاول چورنگی پر طویل انتظار پر شہری وی آئی پی موومنٹ کے دوران سیکیورٹی حصار توڑ کر چلے گئے۔تفصیلات کے مطابق کراچی میں وی آئی پی موومنٹ کے دوران سڑکوں کی بندش پر شہریوں کا صبر جواب دے گیا، بلاول چورنگی پر طویل انتظار کے بعد شہریوں نے سیکیورٹی حصار توڑ کر راستہ اختیار کر لیا۔

رپورٹس میں بتایا گیا کہ واقعہ رات تقریباً 9بجے پیش آیا، جب وی آئی پی قافلے کی گزرگاہ کے لیے ٹریفک کو آدھا گھنٹہ تک روکے رکھا گیا، انتظار سے تنگ آئے شہری، خصوصاً موٹر سائیکل سوار، پولیس کی ہدایات کے باوجود آگے بڑھنے لگے اور بعض نے سیکیورٹی حصار بھی توڑ دیا۔سوشل میڈیا پر وائرل ویڈیو میں دیکھا جا سکتا ہے کہ پولیس اہلکار ٹریفک کو روکنے کی کوشش کر رہے ہیں جبکہ متعدد شہری وی آئی پی پروٹوکول کو نظر انداز کرتے ہوئے راستہ عبور کر رہے ہیں تاہم، تاحال متعلقہ وی آئی پی شخصیت کی شناخت سامنے نہیں آ سکی۔

(جاری ہے)

عینی شاہدین نے کہاکہ سڑک بند ہونے کے باعث شہریوں کو شدید مشکلات کا سامنا کرنا پڑا، جس پر کئی افراد نے شدید برہمی کا اظہار کیا۔ویڈیو میں دیکھا جاسکتا ہے کہ عین موقع پر جب سیکیورٹی کے قافلے پہنچنا شروع ہوئے لوگ ناکہ بندی کو توڑتے ہوئے سامنے آگئے جس کے باعث قافلے میں شامل گاڑیاں پھنس گئیں۔واقعے کے بعد سوشل میڈیا پر ملا جلا ردعمل دیکھنے میں آیا۔

بعض صارفین نے وی آئی پی کلچر اور بار بار سڑکوں کی بندش کو تنقید کا نشانہ بنایاجبکہ دیگر نے سیکیورٹی خدشات کے پیش نظر پولیس احکامات کی خلاف ورزی کو خطرناک قرار دیا۔تاحال کراچی پولیس یا ضلعی انتظامیہ کی جانب سے اس واقعے پر کوئی باضابطہ بیان جاری نہیں کیا گیا، تاہم ویڈیو وائرل ہونے کے بعد شہر میں وی آئی پی پروٹوکول، ٹریفک مینجمنٹ اور عوامی مشکلات پر بحث ایک بار پھر شدت اختیار کر گئی ہے۔سوشل میڈیا صارفین نے اس واقعے پر خوشی کا اظہار کرتے ہوئے کہا کہ وی آئی پی پروٹوکول میں شہریوں کو طویل انتظار کرانا کسی صورت قابل قبول نہیں۔