معرکہ حق آپریشن ''بنیان مرصوص'' کی کامیابی کو ایک سال مکمل

بدھ 6 مئی 2026 22:25

مظفرآباد(اُردو پوائنٹ اخبارتازہ ترین - آن لائن۔ 06 مئی2026ء) معرکہ حق آپریشن ''بنیان مرصوص'' کی کامیابی کو ایک سال مکمل ہونے کے موقع پر مرکزی سیکرٹری جنرل پاکستان پیپلزپارٹی خواتین ونگ آزاد جموں وکشمیر سیدہ شگفتہ نورین کاظمی کی جانب سے پیپلز سیکرٹریٹ بینک سکوائر چھتر میں ایک پروقار تقریب کا انعقاد کیا گیا،جس میں کیک کاٹا گیا اور اس اہم کامیابی کو بھرپور انداز میں خراجِ تحسین پیش کیا گیا۔

تقریب میں سینئر رہنما رخسانہ شفقت،سونیا خوشحال،سینئر نذہت گیلانی،جنرل سیکرٹری ضلع مظفرآباد نورالعین قاضی،نائب صدر شازیہ بٹ،مریم راجہ،نورین امجد عباسی،سیدہ نورین کاظمی،سیدہ نازیہ کاظمی،رضیہ بی بی،تانیہ بی بی،مریم میر،دانیہ صدیق،روفینہ اشتیاق،آمنہ بی بی نے شرکت کی۔

(جاری ہے)

تقریب سے خطاب کرتے ہوئے سیدہ شگفتہ نورین کاظمی نے معرکہ حق ''بنیان مرصوص'' کی کامیابی کو قومی تاریخ کا ایک اہم سنگِ میل قرار دیتے ہوئے کہا کہ یہ کامیابی نہ صرف پاک افواج کی پیشہ ورانہ مہارت بلکہ قوم کے عزم و اتحاد کی بھی عکاس ہے۔

چیف آف ڈیفنس فورسز فیلڈ مارشل جنرل سید عاصم منیر کی قیادت نے پاک فوج نے بھارت کو ناکوں چنے چبوائے اور بھارت کا غرور خاک میں ملا دیا۔ان کا کہنا تھا کہ ایسے مواقع قوموں کے حوصلے بلند کرتے ہیں اور دشمن کو واضح پیغام دیتے ہیں کہ پاکستان ہر قسم کے چیلنج کا مقابلہ کرنے کی بھرپور صلاحیت رکھتا ہے۔اس موقع پر دیگر مقررین نے کہا کہ پاکستان کی بہادر اور پیشہ ور افواج نے ہمیشہ ملک کے دفاع کو ناقابل تسخیر بنایا ہے۔

بنیان مرصوص کی کامیابی اس بات کا واضح ثبوت ہے کہ پاکستان دفاعی لحاظ سے ایک مضبوط اور مستحکم ملک ہے، جو اپنی سرحدوں کے تحفظ کے لیے ہر وقت تیار ہے۔مقررین نے بھارت کو خبردار کرتے ہوئے کہا کہ اگر مستقبل میں کسی بھی قسم کی جارحیت یا مہم جوئی کی گئی تو پاکستان کی افواج اس سے بھی زیادہ سخت اور بھرپور جواب دینے کی مکمل صلاحیت رکھتی ہیں۔

انہوں نے کہا کہ قوم اپنی افواج کے ساتھ کھڑی ہے اور ملکی دفاع پر کسی قسم کا سمجھوتہ نہیں کیا جائے گا۔تقریب کے اختتام پر شرکاء نے ملک کی سلامتی،استحکام،مقبوضہ جموں وکشمیر کی آزادی اور مسلح افواجِ پاکستان کی کامیابیوں کے لیے خصوصی دعا ئیں کیں اور کیک کاٹ کر خوشی کا اظہار کیا گیا۔شرکاء تقریب نے اس عزم کا اعادہ کیا کہ وہ ہر مشکل گھڑی میں پاکستان کے ساتھ کھڑے رہیں گے اور قومی یکجہتی کو مزید مضبوط بنائیں گے۔