Live Updates

ٹرمپ نے ایران سے جلد ڈیل ہونے کی امید ظاہر کردی

بدھ 6 مئی 2026 22:15

واشنگٹن (اُردو پوائنٹ اخبارتازہ ترین - این این آئی۔ 06 مئی2026ء) امریکی صدر ڈونلڈ ٹرمپ نے ایران سے جلد ڈیل ہونے کی امید ظاہر کردی۔پی بی ایس نیوز کو دیے گئے انٹرویو میں ٹرمپ نے کہا کہ اس سے پہلے بھی کئی مواقع پر ایسا لگا تھا کہ ڈیل ہونے والی ہے۔انہوں نے کہا کہ اس لیے دیکھنا ہوگا کہ ڈیل ہوتی ہے یا نہیں، ڈیل کے لیے ضروری ہوگا کہ ایران اپنی افزودہ یورینیم کو امریکا بھجوادے اور دوبارہ زیر زمین سرگرمیاں شروع نہ کرنے کی یقین دہانی کرائے۔

(جاری ہے)

اس سے قبل امریکی صدر کہہ چکے ہیں کہ اگر ایران اس پر راضی ہوجائے ،جس پر امریکا راضی ہے تو جنگ ختم ہوسکتی ہے۔انہوں نے کہا کہ ڈیل نہ کرنے پر امریکا ایران پر پہلے سے شدید بمباری شروع کرسکتا ہے۔ایران امریکا ڈیل جلد ہونے کی اطلاعات پر جب ایک امریکی رپورٹر نے ٹرمپ کو فون کر کے پوچھا کہ کیا وہ اسلام آباد جانے کی تیاری کرے تو صدر نے جواب دیا، ابھی نہیں، ابھی امریکی و ایرانی عہدے داروں کی آمنے سامنے ملاقات میں کچھ اور وقت لگے گا۔