پاکستان کی بہادر اور پیشہ ور افواج نے ہمیشہ ملک کے دفاع کو ناقابل تسخیر بنایا ،چمن خان

جمعرات 7 مئی 2026 13:41

مظفرآباد(اُردو پوائنٹ اخبارتازہ ترین - این این آئی۔ 07 مئی2026ء) معرکہ حق آپریشن ''بنیان مرصوص'' کی کامیابی کو ایک سال مکمل ہونے کے موقع پر سینئر نائب صدر مسلم لیگ ن سٹی مظفرآباد چمن خان نے معرکہ حق ''بنیان مرصوص'' کی کامیابی کو قومی تاریخ کا ایک اہم سنگِ میل قرار دیتے ہوئے کہا کہ یہ کامیابی نہ صرف پاک افواج کی پیشہ ورانہ مہارت بلکہ قوم کے عزم و اتحاد کی بھی عکاس ہے۔

چیف آف ڈیفنس فورسز فیلڈ مارشل جنرل سید عاصم منیر کی قیادت نے پاک فوج نے بھارت کو ناکوں چنے چبوائے اور بھارت کا غرور خاک میں ملا دیا۔ان کا کہنا تھا کہ ایسے مواقع قوموں کے حوصلے بلند کرتے ہیں اور دشمن کو واضح پیغام دیتے ہیں کہ پاکستان ہر قسم کے چیلنج کا مقابلہ کرنے کی بھرپور صلاحیت رکھتا ہے۔

(جاری ہے)

چمن خان نے کہا کہ پاکستان کی بہادر اور پیشہ ور افواج نے ہمیشہ ملک کے دفاع کو ناقابل تسخیر بنایا ہے۔

بنیان مرصوص کی کامیابی اس بات کا واضح ثبوت ہے کہ پاکستان دفاعی لحاظ سے ایک مضبوط اور مستحکم ملک ہے جو اپنی سرحدوں کے تحفظ کے لیے ہر وقت تیار ہے۔چمن خان نے بھارت کو خبردار کرتے ہوئے کہا کہ اگر مستقبل میں کسی بھی قسم کی جارحیت یا مہم جوئی کی گئی تو پاکستان کی افواج اس سے بھی زیادہ سخت اور بھرپور جواب دینے کی مکمل صلاحیت رکھتی ہیں۔انہوں نے کہا کہ قوم اپنی افواج کے ساتھ کھڑی ہے اور ملکی دفاع پر کسی قسم کا سمجھوتہ نہیں کیا جائے گا۔

چمن خان نے ملک کی سلامتی،استحکام،مقبوضہ جموں وکشمیر کی آزادی اور مسلح افواجِ پاکستان کی کامیابیوں کے لیے خصوصی دعائیں کیں اور معرکہ حق کی کامیابی پر خوشی کا اظہار کیا گیا۔چمن خان نے اس عزم کا اعادہ کیا کہ وہ ہر مشکل گھڑی میں پاکستان کے ساتھ کھڑے رہیں گے اور قومی یکجہتی کو مزید مضبوط بنائیں گے۔