ملزم کی عدم گرفتاری پر سی پی او فیصل آباد تنویر حسین 13مئی کو لاہور ہائیکورٹ طلب

جمعرات 7 مئی 2026 17:34

لاہور (اُردو پوائنٹ اخبارتازہ ترین - این این آئی۔ 07 مئی2026ء) لاہور ہائیکورٹ کے حکم کے باجود ملزم کو گرفتار نہ کرنے پر توہین عدالت کیس میں سی پی او فیصل آباد تنویر حسین کو طلب کرلیا گیا ، چیف جسٹس ہائیکورٹ عالیہ نیلم نے سی پی او کو 13مئی کوپیش ہونے کا حکم دے دیا۔

(جاری ہے)

چیف جسٹس عالیہ نیلم نے شہری لیاقت علی کی درخواست پر سماعت کی ،درخواست گزار نے 2019ء میں ملزم کی عدم گرفتاری پر سی پی او فیصل آباد کے خلاف توہین عدالت کی درخواست دائر کی چیف جسٹس نے استفسار کیا کہ ملزم ابھی تک گرفتار کیوں نہیں ہوئے ، ایس ایچ او نے جواب دیا کہ 2019ء کا کیس ہے، اس وقت کا تفتیشی افسر ریٹائر ہوگیا تھا ، چیف جسٹس نے ایس ایچ او سے مکالمہ کرتے ہوئے کہا کہ اگر تفتیشی ریٹائر ہوگیا تھا تو پھر تفتیشی کسی اور کو نہیں دینی تھی ، کیا ملزم گرفتار کرنا پولیس کی ذمہ داری نہیں ہے ملزم کو گرفتار کرنے کے لئے مہلت مانگنے پر چیف جسٹس نے کہا 7 سال پہلے گزر چکے ہیں آپ کو کتنے اور سال چاہیں ، عدالت نے سی پی او فیصل آباد کو طلب کرتے ہوئے کیس کی مزید سماعت 13مئی تک ملتوی کر دی ،ملزم کے خلاف تھانہ ماموں کانجن میں مقدمہ درج ہے۔