میں خود کو کسی صورت سلمان خان کے برابر نہیں سمجھتا، رجب بٹ کی وضاحت

طالب علمی کے زمانے میں ضرور سلمان خان سے متاثر رہا، نویں جماعت میں اداکار کی نقل کرتے ہوئے کان چھدوائے اور باڈی بلڈنگ کا شوق بھی ان کو ہی دیکھ کر پیدا ہوا، پوڈ کاسٹ میں گفتگو

فیضان ہاشمی جمعہ 8 مئی 2026 11:08

میں خود کو کسی صورت سلمان خان کے برابر نہیں سمجھتا، رجب بٹ کی وضاحت

لاہور(اُردو پوائنٹ اخبارتازہ ترین۔ 08 مئی2026ء) معروف یوٹیوبر رجب بٹ نے سوشل میڈیا پر ہونے والے اپنے اور بالی ووڈ اداکار سلمان خان کے موازنے پر ردعمل دیتے ہوئے کہا ہے کہ وہ خود کو کسی صورت سلمان خان کے برابر نہیں سمجھتے۔ ایک پوڈ کاسٹ میں گفتگو کرتے ہوئے رجب بٹ نے کہا کہ انہیں کبھی یہ غلط فہمی نہیں رہی کہ ان کا مقابلہ سلمان خان جیسے بڑے اسٹار سے کیا جا سکتا ہے۔

ان کے مطابق طالب علمی کے زمانے میں وہ ضرور سلمان خان سے متاثر رہے، حتیٰ کہ نویں جماعت میں انہوں نے اداکار کی نقل کرتے ہوئے کان چھدوائے اور باڈی بلڈنگ کا شوق بھی وہیں سے پیدا ہوا۔ سوشل میڈیا پر وائرل ویڈیو جس میں مداحوں کو ہاتھ ہلانے پر انہیں سلمان خان کی نقل قرار دیا گیا، رجب بٹ نے وضاحت دی کہ یہ کسی اداکاری یا نقل کا حصہ نہیں تھا بلکہ مداحوں کی محبت کا سادہ سا جواب تھا۔

(جاری ہے)

ان کا کہنا تھا کہ وہاں موجود لوگ شور مچا رہے تھے، کچھ نام پکار رہے تھے اور کچھ شاعری سنا رہے تھے، جس پر انہوں نے باہر آ کر صرف ہاتھ ہلایا، تاہم اس عمل کو غلط انداز میں پیش کر کے انہیں ٹرول کیا گیا۔ رجب بٹ نے مزید کہا کہ سلمان خان کا مقام، تجربہ اور حیثیت بالکل مختلف ہے اور ان سے کوئی موازنہ نہیں بنتا۔ ان کے بقول بے بنیاد تنقید صرف اس لیے کی جاتی ہے کیونکہ بعض لوگوں کے پاس کرنے کیلئے کوئی مثبت کام نہیں ہوتا۔