فیفا ورلڈکپ فائنل،20 لاکھ ڈالر کا ٹکٹ خریدنے پر ہاٹ ڈاگ اور کولڈ ڈرنک مفت

فائنل کے بعض ٹکٹ فی کس تقریبا 23 لاکھ ڈالرتک ری سیل مارکیٹ میں فروخت کے لیے پیش کیے گئے ہیں، رپورٹ

جمعہ 8 مئی 2026 12:33

فیفا ورلڈکپ فائنل،20 لاکھ ڈالر کا ٹکٹ خریدنے پر ہاٹ ڈاگ اور کولڈ ڈرنک ..

زیور خ (اُردو پوائنٹ اخبارتازہ ترین - این این آئی۔ 08 مئی2026ء) فیفا کے صدر گیانی انفینٹینو نے کہا ہے کہ فیفا ورلڈکپ فائنل کا ٹکٹ خریدنے پر ہاٹ ڈاگ اور کولڈ ڈرنک مفت ملے گی۔ورلڈ کپ فائنل کے مہنگے ٹکٹوں پر ہونے والی تنقید کے درمیان گیانی انفینٹینو نے دلچسپ بیان دیتے ہوئے کہا کہ اگر کوئی شائق 20 لاکھ ڈالر کا ٹکٹ خریدتا ہے تو وہ ذاتی طور پر اسے ہاٹ ڈاگ اور کوک فراہم کریں گے۔

انہوں نے کہاکہ وہ اس بات کو یقینی بنائیں گے کہ مداح کو بہترین تجربہ حاصل ہو۔یاد رہے کہ رواں سال امریکا میں شیڈول فیفا ورلڈ کپ فائنل کے لیے ٹکٹوں کی قیمتیں مسلسل خبروں میں ہیں۔میڈیا رپورٹس کے مطابق نیو جرسی میں فائنل کے بعض ٹکٹ فی کس تقریبا 23 لاکھ ڈالر تک ری سیل مارکیٹ میں فروخت کے لیے پیش کیے گئے ہیں۔

(جاری ہے)

انفینٹینو نے وضاحت کی کہ اس کا مطلب یہ نہیں کہ فیفا نے ٹکٹ اتنی قیمت پر فروخت کیے ہیں بلکہ امریکا میں ٹکٹ دوبارہ فروخت کرنے کی اجازت ہے جس کی وجہ سے قیمتیں کئی گنا بڑھ جاتی ہیں۔

انہوں نے کہا کہ اگر ابتدائی قیمت کم رکھی جائے تو لوگ انہیں مہنگے داموں دوبارہ فروخت کرتے ہیں۔ فیفا صدر کے مطابق گروپ مرحلے کے تقریبا 25 فیصد ٹکٹ 300 ڈالر سے کم قیمت میں دستیاب ہیں جو امریکی کالج کھیلوں کے مقابلوں کے برابر سمجھے جا سکتے ہیں۔