آئی پی ایل کے کھلاڑیوں کیخلاف بی سی سی آئی کا سخت ایکشن، معطلی و کمروں کی چیکنگ کا خطرہ بڑھ گیا

جمعہ 8 مئی 2026 12:14

نئی دہلی (اُردو پوائنٹ اخبارتازہ ترین - این این آئی۔ 08 مئی2026ء) بورڈ آف کنٹرول فار کرکٹ ان انڈیا (بی سی سی آئی)نے انڈین پریمیئر لیگ 2026 کے دوران کھلاڑیوں اور ٹیم عہدیداروں کے لیے سخت ضابطے نافذ کر دئیے۔بھارتی میڈیا کے مطابق بی سی سی آئی کے سیکریٹری دیواجیت سیکیا کی جانب سے تمام 10 فرنچائزز کو 7 صفحات پر مشتمل ہدایت نامہ جاری کیا گیا ہے۔ہدایت نامے میں غیر مجاز افراد کے ٹیم کے ہوٹلوں اور کھلاڑیوں کے کمروں تک رسائی پر مکمل پابندی عائد کر دی گئی ہے۔

ہدایت نامے میں بی سی سی آئی نے خبردار کیا کہ نامناسب اور رومانوی تعلقات، بلیک میلنگ اور جنسی بدسلوکی جیسے سنگین معاملات سے بچنے کے لیے اچانک ہوٹل چیکنگ کی جائے گی، بورڈ اور آئی پی ایل انتظامیہ پر مشتمل خصوصی ٹیم کھلاڑیوں کے کمروں اور ہوٹل میں سرگرمیوں کی نگرانی کرے گی۔

(جاری ہے)

ہدایت نامے کے مطابق کسی بھی کھلاڑی یا آفیشل کے کمرے میں بغیر اجازت کسی شخص کے داخلے کی اجازت نہیں ہو گی چاہے اس کا تعلق کھلاڑی سے ذاتی نوعیت کا ہی کیوں نہ ہو، تمام کھلاڑیوں اور معاون عملے کو ہوٹل سے باہر جانے سے پہلے سیکیورٹی حکام کو اطلاع دینا لازمی ہو گا۔

بی سی سی آئی نے واضح کیا ہے کہ ضابطوں کی خلاف ورزی پر شوکاز نوٹس، جرمانہ، معطلی یا نااہلی جیسی سخت کارروائی کی جا سکتی ہے۔ بھارتی میڈیا کے مطابق آئی پی ایل کے فرنچائز مالکان کو بھی میچ کے دوران ڈگ آئوٹ میں کھلاڑیوں یا ٹیم مینجمنٹ سے رابطے سے روک دیا گیا ہے۔دیواجیت سیکیا نے کہا کہ حالیہ سیزن میں کئی بے ضابطگیاں سامنے آئی ہیں جن میں غیر مجاز افراد کا ٹیم کی بسوں میں سفر، ہوٹلوں میں آمد و رفت اور کھلاڑیوں کے کمروں تک رسائی شامل ہے جو قوانین کی کھلی خلاف ورزی ہے۔

بھارتی میڈیا کے مطابق راجستھان رائلز کے منیجر کی جانب سے ڈگ آٹ میں موبائل فون استعمال کرنے اور کپتان سنجو سیمسن کے ڈریسنگ روم میں ویپنگ کرنے کے واقعات کے بعد بی سی سی آئی نے سخت موقف اختیار کیا ہے۔بھارتی کرکٹ بورڈ نے بتایا کہ آئندہ کسی بھی خلاف ورزی پر کسی بھی کھلاڑی کو رعایت نہیں دی جائے گی اور معطل کر دیا جائے گا۔