پاکستان نے بچوں میں غذائی کمی کے خلاف ایک بڑی کامیابی حاصل کر لی

خواتین بینیفشریز کے بچوں میں غذائی کمی کی شرح میں 22 فیصد تک کمی آئی ہے،بینظیرنشوونماپروگرام کے جائزہ اجلاس میں بریفنگ

جمعہ 8 مئی 2026 12:14

اسلام آباد(اُردو پوائنٹ اخبارتازہ ترین - این این آئی۔ 08 مئی2026ء) پاکستان نے بچوں میں غذائی کمی کے خلاف ایک بڑی کامیابی حاصل کر لی ہے۔اسلام آباد میں بینظیر نشوونما پروگرام کے جائزہ اجلاس کو بتایا گیا کہ آغا خان یونیورسٹی کی آزادانہ تحقیق کے مطابق خواتین بینیفشریز کے بچوں میں غذائی کمی کی شرح میں 22 فیصد تک کمی آئی ہے۔اس موقع پر وفاقی وزیر تخفیف غربت سید عمران احمد شاہ نے ان نتائج کو پاکستان کے سماجی تحفظ کے شعبے کی ایک بڑی کامیابی قرار دیا۔

(جاری ہے)

چیئرپرسن بی آئی ایس پی سینیٹرروبینہ خالد نے نے بتایا کہ یہ پروگرام ملک کے 157 اضلاع میں 578 سہولت مراکز اور 169 سٹیبلائزیشن سنیٹرز کی مدد سے 45 لاکھ سے زائد خواتین اور بچوں تک پہنچ چکا ہے۔اجلاس کے دوران نیشنل کمیشن آن چائلڈ رائٹس کی عائشہ رضا فاروق، آغا خان یونیورسٹی کے عالمی شہرت یافتہ ماہر صحت ڈاکٹر ذوالفقار بھٹہ اور بل اینڈ میلنڈا گیٹس فاؤنڈیشن کی انیتا زیدی نے بینظیر نشوونما پروگرام کو سماجی تحفظ کا ایک مؤثر ماڈل قرار دیا اور خواتین و بچوں کی زندگی بہتر بنانے کیلئے حکومتِ پاکستان کی قیادت کو سراہا۔