متحدہ عرب امارات سے پاکستانی شہریوں کی مبینہ ہدفی بے دخلیوں سے متعلق خبریں بے بنیاد اور گمراہ کن ہیں۔وزارتِ داخلہ

ہفتہ 9 مئی 2026 00:00

اسلام آباد (اُردو پوائنٹ اخبارتازہ ترین - اے پی پی۔ 08 مئی2026ء) وزارتِ داخلہ نے متحدہ عرب امارات سے پاکستانی شہریوں کی مبینہ ہدفی بے دخلیوں سے متعلق بعض ذرائع ابلاغ، خصوصاً سوشل میڈیا پر گردش کرنے والی خبروں کو بے بنیاد، گمراہ کن اور بدنیتی پر مبنی پروپیگنڈا قرار دیتے ہوئے واضح کیا ہے کہ کسی بھی ملک، بشمول متحدہ عرب امارات، سے کسی مخصوص ملک یا فرقے سے تعلق رکھنے والے افراد کی ہدفی بے دخلی نہیں کی جا رہی۔

وزارتِ داخلہ کی جانب سے جاری بیان میں کہا گیا ہے کہ بعض حلقے حقائق کو توڑ مروڑ کر پیش کر رہے ہیں، حالانکہ اگر کسی فرد کو کسی ملک سے واپس بھیجا جاتا ہے تو یہ متعلقہ میزبان ملک کے قوانین، ویزا ضوابط، غیر قانونی دستاویزات، قیام کی مدت ختم ہونے یا دیگر قانونی وجوہات کی بنیاد پر معمول کے انتظامی عمل کا حصہ ہوتا ہے۔

(جاری ہے)

جاری بیان کے مطابق پاکستانی شہری بدستور متحدہ عرب امارات اور دیگر دوست ممالک میں قانونی تقاضے پورے کرتے ہوئے ملازمت، کاروبار اور دیگر ویزہ سہولیات سے استفادہ کر رہے ہیں اور اس ضمن میں کسی قسم کا امتیازی سلوک موجود نہیں۔

وزارتِ داخلہ نے کہا کہ سوشل میڈیا پر پھیلائی جانے والی جعلی خبریں اور من گھڑت دعوے مخصوص مذموم مقاصد کے تحت پھیلائے جا رہے ہیں تاکہ عوام میں بے چینی اور غلط فہمیاں پیدا کی جا سکیں۔ بیان میں مزید کہا گیا کہ بیرونِ ملک مقیم کسی بھی پاکستانی شہری کو درپیش مسائل یا قانونی معاملات متعلقہ ممالک کے ساتھ دفترِ خارجہ کے قائم شدہ سفارتی ذرائع کے ذریعے ہر کیس کی بنیاد پر اٹھائے جاتے ہیں تاکہ پاکستانی شہریوں کے حقوق اور مفادات کا تحفظ یقینی بنایا جا سکے۔