بہاولپور میں ”اپنا کھیت اپنا روزگار“ سکیم کے حوالے سے اجلاس،11 ہزار سے زائد درخواستیں موصول

ہفتہ 9 مئی 2026 00:00

بہاولپور (اُردو پوائنٹ اخبارتازہ ترین - اے پی پی۔ 08 مئی2026ء) کمشنر بہاولپور عرفان علی کاٹھیا کی زیر صدارت”اپنا کھیت اپنا روزگار“ سکیم کے حوالے سےاجلاس منعقد ہوا، جس میں سکیم کی پیش رفت، درخواستوں کی جانچ پڑتال اورمختص اراضی سے متعلق امور کا جائزہ لیا گیا۔ اجلاس میں ممبر کالونیز بورڈ آف ریونیو ملک عبد الواحید نے بھی خصوصی شرکت کی۔ اجلاس میں سکیم کے تحت اٹھائے جانے والے اقدامات سے متعلق بریفنگ دی گئی۔

اس موقع پر ڈپٹی کمشنر بہاولپور سید حسن رضا، ایڈیشنل کمشنر کوآرڈینیشن ڈاکٹر نیئر مصطفیٰ، ایڈیشنل ڈپٹی کمشنر ریونیو بہاولپور شگفتہ جبیں، اور اسسٹنٹ کمشنر جنرل خضر رزاق منج شریک ہوئے، جبکہ ڈپٹی کمشنر بہاولنگر ذوالفقار احمد بھون اور ایڈیشنل ڈپٹی کمشنر ریونیو رحیم یار خان بذریعہ ویڈیو لنک اجلاس میں شامل ہوئے۔

(جاری ہے)

اجلاس کو بتایا گیا کہ ”اپنا کھیت اپنا روزگار“ سکیم کے تحت اب تک 11 ہزار سے زائد درخواستیں موصول ہو چکی ہیں، جن کی جانچ پڑتال کا عمل تیزی سے جاری ہے۔

مزید بتایا گیا کہ بہاولپور ڈویژن کے تینوں اضلاع اور چولستان ڈویلپمنٹ اتھارٹی کے زیر انتظام مجموعی طور پر 29 ہزار 912 لاٹس مختص کی گئیں ہیں، جنہیں میرٹ کی بنیاد پر مستحقین میں تقسیم کیا جائے گا۔ بریفنگ میں یہ بھی آگاہ کیا گیا کہ اسکیم سے متعلق معلومات حاصل کرنے اور استفادہ کے لیے رجسٹرڈ سائن اپس کی تعداد ایک لاکھ 19 ہزار 542 تک پہنچ چکی ہے، جو عوام کی بھرپور دلچسپی کا مظہر ہے۔

کمشنر بہاولپورنے اجلاس سے خطاب کرتے ہوئے ہدایت کی کہ تمام متعلقہ محکمے شفافیت اور میرٹ کو یقینی بناتے ہوئے درخواستوں کی جانچ پڑتال جلد مکمل کریں تاکہ مستحق افراد کو بروقت اراضی کی فراہمی ممکن بنائی جا سکے۔ انہوں نے کہا کہ وزیر اعلیٰ پنجاب کے وژن کے مطابق بے زمین کاشتکاروں کو بااختیار بنانا حکومت کی اولین ترجیح ہے اور اس سلسلے میں کسی قسم کی کوتاہی برداشت نہیں کی جائے گی۔