ہماری فتح بنیان المرصوص ہونے اوررہنے میں ہے‘ وزیرتعلیم پنجاب

ہفتہ 9 مئی 2026 20:34

لاہور (اُردو پوائنٹ اخبارتازہ ترین - این این آئی۔ 09 مئی2026ء) صوبائی وزیر تعلیم رانا سکندر حیات نے معرکہ حق کی مناسبت سے پی ایف یو سی کے زیر اہتمام تصویری نمائش کا دورہ کیا جہاں انہوں نے بنیان المرصوص کی یادگاری تصاویر دیکھی اور پینٹنگز بنانے والے نوجوانوں کی حوصلہ افزائی کی۔ اس موقع پر گفتگو کرتے ہوئے وزیر تعلیم نے کہا کہ جو اپنے جدید ترین ہتھیاروں پر نازاں تھے اور رافیل کو اپنے لئے تمغہ امتیاز سمجھتے تھے، پاکستان نے کھلونوں کی طرح انہیں زمین بوس کیا۔

انہوں نے کہا کہ آج افواج پاکستان کی وجہ سے ہمارے سر فخر سے بلند ہیں۔ پاکستان نے اپنی خودمختاری کا دفاع کرکے بتا دیا کہ ہمیں حقوق کا تحفظ کرنا آتا ہے۔ وزیر تعلیم نے کہا کہ آج ہم بنیان المرصوصں قومی دن کے طور پر منا رہے ہیں۔

(جاری ہے)

فیلڈ مارشل، ائیر چیف، ایک ایک فوجی جوان آج کے دن مبارکباد کا مستحق ہے۔ رانا سکندر حیات نے کہا کہ افواج پاکستان نے ٹیکنالوجی سے انڈیا کو مات دے کر داستان رقم کی اور ایک بڑی معیشت اور وسائل کے حامل ملک کو چاروں شانے چت کیا۔

وزیر تعلیم نے مزید کہا کہ پاکستان نے زمین، فضا، سمندروں اور پہاڑوں پر اپنی برتری ثابت کی۔ پہلگام واقعہ سے لے کر آپریشن بنیان المرصوص تک پاکستان نے ہر شعبہ پر برتری دکھائی۔ تریب سے خطاب کرتے ہوئے وزیر تعلیم کا کہنا تھا کہ ایک سال بعد بھی انڈیا کے پاس پاکستان کے خلاف کوئی ثبوت نہیں۔ ہماری فتح بنیان المرصوص ہونے اور رہنے میں ہے۔ انہوں نے کہا کہ ہم عام شہری کے طور پر خطے میں امن چاہتے ہیں، لیکن اپنی خودمختاری پر کوئی سمجھوتہ نہیں کریں گے۔

وزیر تعلیم نے افواج پاکستان سے اظہار یکجہتی کرتے ہوئے کہا کہ ہم فیلڈ مارشل کے پیچھے سیسہ پلائی دیوار بن کر کھڑے ہیں۔ انہوں نے بھارت پر واضح کیا کہ اگر انڈیا نے دوبارہ غلطی کی تو پہلے سے زیادہ سخت جواب ملے گا۔ رانا سکندر حیات کا مزید کہنا تھا کہ آج پاکستان عالمی جنگوں پر ثالثی کروا رہا ہے اور انڈیا منہ تک رہا ہے۔ دنیا امن کیلئے پاکستان کی کوششوں کی معترف ہے۔ تقریب میں وزیر تعلیم نے پینٹنگز بنانے والے طلبا میں سرٹیفکیٹ بھی تسلیم کئے۔