دبئی کریک پر لنگر انداز بڑی مسافر کشتی میں اچانک آگ بھڑک اٹھی

واقعے کے حوالے سے کسی بھی قسم کی غیر مصدقہ معلومات یا افواہیں پھیلانے سے گریز کریں؛ حکام کی عوام سے اپیل

ساجد علی اتوار 10 مئی 2026 17:03

دبئی کریک پر لنگر انداز بڑی مسافر کشتی میں اچانک آگ بھڑک اٹھی

دبئی (اُردو پوائنٹ اخبارتازہ ترین۔ 10 مئی2026ء) دبئی کے علاقے الجداف میں دبئی کریک کے کنارے لگی آگ کے حوالے سے حکام نے صورتحال واضح کی ہے کہ یہ آگ دبئی کریک پر کھڑی ایک کشتی میں لگی تھی، جس کے نتیجے میں کوئی جانی نقصان نہیں ہوا۔ خلیجی میڈیا کے مطابق اتوار کے روز الجداف کے علاقے میں دبئی کریک پر لنگر انداز ایک کشتی میں اچانک آگ بھڑک اٹھی، اس واقعے کے بعد سامنے آنے والی تصاویر میں کشتی سے بلند ہوتے آگ کے شعلے اور گہرے سیاہ دھویں کے بادل صاف دیکھے جا سکتے ہیں۔

حکام نے واضح کیا ہے کہ آگ کے باعث اٹھنے والا شدید سیاہ دھواں کشتی کی تعمیر میں استعمال ہونے والے 'فائبر گلاس' کے جلنے کی وجہ سے پیدا ہوا، فائبر گلاس میں کیمیائی اجزاء کی موجودگی کے باعث آگ لگنے کی صورت میں دھواں انتہائی گہرا اور سیاہ ہوتا ہے، خوش قسمتی سے اس حادثے میں کسی جانی نقصان یا زخمی ہونے کی اطلاع نہیں ملی، امدادی ٹیموں نے بروقت کارروائی کرتے ہوئے آگ پر قابو پانے کی کوششیں شروع کر دیں تاکہ اسے مزید پھیلنے سے روکا جا سکے۔

(جاری ہے)

دبئی حکام نے عوام سے پرزور اپیل کی ہے کہ واقعے کے حوالے سے کسی بھی قسم کی غیر مصدقہ معلومات یا افواہیں پھیلانے سے گریز کریں، اس سلسلے میں تمام معلومات کے لیے صرف سرکاری ذرائع پر بھروسہ کریں تاکہ کسی بھی قسم کی بے چینی یا غلط فہمی پیدا نہ ہو۔