پاکستان اور قطر کا خطے میں پائیدار امن اور استحکام کیلئے مل کر کام کرنے پر اتفاق

وزیراعظم شہباز شریف کا قطری ہم منصب سے رابطہ، دونوں رہنماؤں کے درمیان علاقائی صورتحال اور دوطرفہ تعاون پر تفصیلی گفتگو ہوئی، امیرِ قطر کے جلد دورہ پاکستان کا امکان

Sajid Ali ساجد علی اتوار 10 مئی 2026 14:06

پاکستان اور قطر کا خطے میں پائیدار امن اور استحکام کیلئے مل کر کام کرنے ..
اسلام آباد (اُردو پوائنٹ اخبارتازہ ترین۔ 10 مئی2026ء) وزیراعظم شہباز شریف اور قطر کے وزیراعظم و وزیر خارجہ شیخ محمد بن عبدالرحمان بن جاسم الثانی کے درمیان ٹیلیفونک رابطہ ہوا ہے، جس میں علاقائی صورتحال اور دوطرفہ تعاون پر تفصیلی گفتگو کی گئی۔ تفصیلات کے مطباق وزیراعظم شہباز شریف نے سماجی رابطے کی ویب سائٹ ایکس پر جاری کردہ اپنے ایک بیان میں بتایا کہ انہیں قطر کے وزیراعظم شیخ محمد بن عبدالرحمان بن جاسم الثانی کی جانب سے ٹیلی فون کال موصول ہوئی، جس میں دونوں رہنماؤں نے دوستانہ ماحول میں بات چیت کی۔

بتایا گیا ہے کہ ٹیلیفونک گفتگو کے دوران دونوں وزرائے اعظم نے خطے کی بدلتی ہوئی صورتحال پر تبادلہ خیال کیا، دونوں رہنماؤں نے خطے میں پائیدار امن، استحکام اور تعمیری مذاکرات کے فروغ کے لیے جاری تمام کوششوں کی مکمل حمایت کرنے کے مشترکہ عزم کا اعادہ کیا، وزیراعظم شہباز شریف نے قطر کی جانب سے علاقائی امن کے لیے ادا کیے جانے والے فعال کردار کو سراہا۔

(جاری ہے)

                                 
معلوم ہوا ہے کہ وزیراعظم نے قطری وزیراعظم کے ذریعے قطر کے امیر شیخ تمیم بن حمد الثانی کے لیے نیک تمناؤں کا پیغام بھیجا، شہباز شریف نے امیرِ قطر کی دانشمندانہ قیادت اور پاکستان کی جانب سے مذاکرات اور سفارت کاری کے ذریعے امن کو آگے بڑھانے کی کوششوں کی مسلسل حمایت پر ان کا شکریہ ادا کیا، وزیراعظم نے اس امید کا اظہار کیا کہ وہ بہت جلد امیرِ قطر شیخ تمیم بن حمد الثانی کے دورہ پاکستان کے منتظر ہیں، جس سے دونوں ممالک کے برادرانہ تعلقات کو مزید تقویت ملے گی۔