رحیم یارخان ،فورم کے قیام کا مقصد یونیورسٹی انتظامیہ اور طلبہ کے درمیان رابطے کو فروغ دینا ہے،وائس چانسلر چانسلر

پیر 11 مئی 2026 21:59

رحیم یارخان (اُردو پوائنٹ اخبارتازہ ترین - اے پی پی۔ 11 مئی2026ء) خواجہ فرید یونیورسٹی آف انجینئرنگ اینڈ انفارمیشن ٹیکنالوجی رحیم یار خان میں طلبہ کو اپنی مشکلات، تجاویز اور آراء براہِ راست یونیورسٹی انتظامیہ تک پہنچانے کے لیے وائس چانسلر پروفیسر ڈاکٹر عامر اعظم خان کی زیرِ نگرانی “اوپن اسٹوڈنٹ فورم” قائم کر دیا۔اس اقدام کا مقصد طلبہ اور یونیورسٹی انتظامیہ کے درمیان مؤثر رابطے کو فروغ دینا اور طلبہ کے مسائل کو بروقت، شفاف اور مؤثر انداز میں حل کرنا ہے۔

اوپن اسٹوڈنٹ فورم کے ذریعے طلبہ فیس، اسکالرشپ، تدریسی امور، ہاسٹل، ٹرانسپورٹ، سکیورٹی، امتحانات یا طلبہ سہولت سے متعلق کسی بھی مسئلے، شکایت یا تجویز کو براہِ راست یونیورسٹی انتظامیہ تک پہنچا سکیں گے۔

(جاری ہے)

تمام موصول ہونے والی شکایات اور تجاویز وائس چانسلر کی نگرانی میں زیرِ غور لائی جائیں گی جبکہ متعلقہ شعبہ جات کو ضروری کارروائی کے لیے شامل کیا جائے گا۔

طلبا اپنی شکایات یا تجاویز مقرر کردہ آفیشل ای میل ایڈریس پر ارسال کر سکتے ہیں۔ یہ ای میل ایڈریس خصوصی طور پر طلبہ کے رابطے کے لیے مختص کیا گیا ہے اور تمام پیغامات کو مکمل سنجیدگی اور رازداری کے ساتھ ہینڈل کیا جائے گا۔اس حوالے سے وائس چانسلر پروفیسر ڈاکٹر عامر اعظم کا کہنا ہے کہ طلبا اس پلیٹ فارم سے بھرپور استفادہ کریں تاکہ یونیورسٹی میں مزید بہتر، طلبہ دوست اور مثبت تعلیمی ماحول کے فروغ میں اپنا کردار ادا کر سکیں۔\378