متحدہ عرب امارات میں عیدالاضحیٰ کی تعطیلات کا اعلان

اس سال عید الاضحیٰ کا پہلا دن 27 مئی بروز بدھ کو ہونے کا قوی امکان ظاہر کردیا گیا

ساجد علی منگل 12 مئی 2026 16:51

متحدہ عرب امارات میں عیدالاضحیٰ کی تعطیلات کا اعلان

ابوظہبی (اُردو پوائنٹ اخبارتازہ ترین۔ 12 مئی2026ء) متحدہ عرب امارات کی وفاقی اتھارٹی برائے انسانی وسائل نے سرکاری ملازمین کے لیے عید الاضحیٰ کی تعطیلات کا باقاعدہ اعلان کر دیا ہے، فلکیاتی حسابات کی بنیاد پر رواں سال سرکاری ملازمین کو ایک طویل تعطیل ملنے کا امکان ہے۔ متحدہ عرب امارات کی وفاقی اتھارٹی نے بیان جاری کیا ہے کہ سرکاری شعبے کے ملازمین کے لیے عید الاضحیٰ کی چھٹیاں پیر 25 مئی سے جمعہ 29 مئی 2026ء تک ہوں گی، اگر ان چھٹیوں کے ساتھ ہفتہ اور اتوار کی ہفتہ وار تعطیلات کو بھی شامل کیا جائے تو ملازمین مسلسل 9 دن کی چھٹیوں سے لطف اندوز ہو سکیں گے، جبکہ دفاتر میں واپسی پیر یکم جون کو ہوگی۔

بتایا گیا ہے کہ اسلامی کیلنڈر کے تحت 9 ذوالحجہ (یومِ عرفہ) اسلام میں مقدس ترین دنوں میں سے ایک سمجھا جاتا ہے، اس سال یومِ عرفہ منگل 26 مئی کو ہونے کی توقع ہے، عید الاضحیٰ کا پہلا دن بدھ 27 مئی کو ہونے کا قوی امکان ہے، یہ ایام سالانہ حج کے موقع پر آتے ہیں جب لاکھوں مسلمان مکہ مکرمہ کا رخ کرتے ہیں۔

(جاری ہے)

فلکیاتی ماہرین اور شارجہ اکیڈمی برائے فلکیات کی پیشکوگئی سے توقع ہے کہ ذوالحجہ کا مہینہ پیر 18 مئی سے شروع ہوگا، اگر اتوار 17 مئی کو ذوالحجہ کا چاند نظر آجاتا ہے تو مہینے کا آغاز پیر سے ہوگا، بصورتِ دیگر ذوالقعدہ کے 30 دن مکمل ہونے کے بعد ذوالحجہ منگل 19 مئی سے شروع ہوگا، متحدہ عرب امارات میں تمام اسلامی تہواروں کی طرح عید کی حتمی تاریخوں کا فیصلہ رویتِ ہلال کمیٹی کے سرکاری اعلان کے بعد کیا جائے گا، جو چاند نظر آنے کی بنیاد پر ہوگا۔