کسی این آر او پر بات نہیں ہوگی، پی ٹی آئی جہاں سے اٹھ کر گئی وہاں انہیں واپس لوٹنا ہے،طلال چوہدری

تحریک انصاف سے مذاکرات کی ٹیبل اسپیکر آفس میں پہلے سے سجی ہوئی ہے، وزیر مملکت برائے داخلہ کی میڈیا سے گفتگو

بدھ 13 مئی 2026 20:00

اسلام آباد (اُردو پوائنٹ اخبارتازہ ترین - این این آئی۔ 13 مئی2026ء) وزیر مملکت برائے داخلہ طلال چوہدری نے کہا ہے کہ کسی این آر او کے ایجنڈے پر کوئی بات نہیں ہوگی، پی ٹی آئی جہاں سے یکطرفہ اٹھ کر گئی تھی وہاں انہیں واپس لوٹنا ہے۔میڈیا سے گفتگو کرتے ہوئے طلال چوہدری نے کہا کہ تحریک انصاف سے مذاکرات کی ٹیبل اسپیکر آفس میں پہلے سے سجی ہوئی ہے، وزیر اعظم کی جانب سے بنائی گئی کمیٹی اور اسپیکر صاحب بھی موجود ہیں۔

وزیر مملکت برائے داخلہ نے کہا کہ ون کانسٹیٹیوش ایونیو والا معاملہ بہت پرانا ہے۔ میں اس کمیٹی کا ممبر ہوں جو اس پر کام کر رہی ہے، کوئی غریب ہو یا امیر سب کے لیے ایک ہی اصول ہے۔وفاقی وزیر نے بتایا کہ اسلام آباد میں حالیہ مختلف وارداتوں کے ملزمان کو گرفتار کیا گیا ہے، اسلام آباد سے اغوا کے بعد نوجوان کا قتل افسوسناک واقعہ ہے۔

(جاری ہے)

نوجوان کے قتل میں ملوث خاتون سمیت تمام افراد کو گرفتار کیا گیا۔

انہوں نے کہا کہ اسلام آباد میں جرائم میں پچھلے سال سے 40 فیصد فرق آیا ہے۔وزیر مملکت نے کہا کہ پاکستان میں قانونی اور غیرقانونی طور پر کئی افغان شہری موجود ہیں۔ پاکستان میں غیرقانونی مقیم کئی لاکھ افغانوں کو واپس بھیجا جا چکا ہے۔انہوں نے واضح کیا کہ افغانی ہو یا کوئی اورغیرقانونی طور پر کسی کو پاکستان میں رہنے کی اجازت نہیں دیں گے۔