معروف گلوکار علی ظفر کی 46ویں سالگرہ18مئی کو منائی جائے گی

جمعرات 14 مئی 2026 12:26

لاہور(اُردو پوائنٹ اخبارتازہ ترین - این این آئی۔ 14 مئی2026ء) معروف گلوکار علی ظفر کی 46ویں سالگرہ18مئی کو منائی جائے گی ۔گلوکار،موسیقار،اداکار اور ماڈل علی ظفر 18مئی 1980 کو لاہور میں پیدا ہوئے انہوں نے اپنے فنی کیرئیر کا آغازاداکارہ و ہدایتکارہ ثمینہ پیرزادہ کی فلم شرارت میں گانا گا کر کیا۔علی ظفر کو اپنے گانوں کی البم حقہ پانی کے گانے چھنو کی آنکھ میںاک نشہ ہے سے بے پناہ شہرت حاصل ہوئی،اس گانے کی البم کی دنیا بھر میں 50لاکھ کاپیز فروخت ہوئیں۔

بالی ووڈ میں اپنی اداکاری کا لوہا منوانے والے علی ظفر نے بالی ووڈ کی کئی سپر ہٹ فلموں میں کام کیا۔ان کی بالی ووڈ فلمو ں میں تیرے بن لادن، میرے برادر کی دلہن، لندن پیرس نیویارک، ٹوٹل سیاپا، کل دل، اور چشم بدور شامل ہیں۔

(جاری ہے)

علی ظفر نے فن اداکاری کا آغاز بھارتی کامیڈی فلم تیرے بن لادن سے کیا جس کے بعد علی ظفر پاک بھارت کے ابھرتے ہوئے سٹار بن گئے بھارتی فلم تیرے بن لادن کی کامیابی کے بعد قسمت کی دیوی علی ظفر پر مہربان ہو گئی اور انہیں اوپر نیچے بھارتی فلموںکی آفرز ہونے لگیں۔پاکستان اور بھارت میںموسیقی کے میدان میں کامیابی کے جھنڈے گاڑنے والے علی ظفر کوبیشمار ایوارڈز سے نوازا گیا ۔علی ظفر کو بھارت کے معتبر فلمی ایوارڈ دادا صاحب پھالکے سے بھی نوازا گیا ہے ۔