گوجرخان ،صاف ستھرا پنجاب پروگرام تحصیل گوجرخان کے سینٹری ورکرز نے تنخواہوں کی عدم ادائیگی،وزیراعلیٰ سے نوٹس لینے کا مطالبہ

جمعرات 14 مئی 2026 21:06

گوجر خان(اُردو پوائنٹ اخبارتازہ ترین - این این آئی۔ 14 مئی2026ء) صاف ستھرا پنجاب پروگرام تحصیل گوجرخان کے سینٹری ورکرز نے تنخواہوں کی عدم ادائیگی،بدانتظامیوں اور مبینہ کرپشن پر وزیر اعلیٰ پنجاب مریم نواز شریف سے فوری نوٹس لینے کا مطالبہ کر دیا۔چیف منسٹر پنجاب کے نام دی گئی درخواست میں سینٹری ورکرز نے موقف اختیار کیا کہ حاضری اور ڈیوٹی مکمل کرنے کے باوجود ان کی تنخواہوں میں کٹوتیاں کی جا رہی ہیں جبکہ بجٹ گزرنے کے باوجود سات ماہ کی تنخواہیں بقایا ہیں۔

درخواست میں الزام عائد کیا گیا کہ انتظامی بدانتظامی کے باعث من پسند اہلکاروں کو سپروائزر تعینات کیا گیا جبکہ نئی بھرتیوں میں سابق سپروائزرز اور ان کے قریبی رشتہ داروں کو نوازا گیا۔ سینٹری ورکرز کے مطابق نہ تو بھرتیوں کے لیے اخبارات میں اشتہار دیا گیا اور نہ ہی مقامی افراد کو میرٹ پر ملازمت کا موقع فراہم کیا گیا۔

(جاری ہے)

سینٹری ورکرز نے مزید الزام لگایا کہ بعض افسران مبینہ کرپشن میں ملوث ہیں اور ان کی ذاتی گاڑیاں رینٹ پر چل رہی ہیں۔

انہوں نے وزیر اعلیٰ پنجاب سے مطالبہ کیا کہ اس امر کی تحقیقات کروائی جائیں کہ چالیس ہزار روپے ماہانہ تنخواہ لینے والے افسران مہنگی گاڑیوں کے مالک کیسے بنے۔سینٹری ورکرز نے مطالبہ کیا کہ تمام معاملات کی شفاف انکوائری کر کے انتظامی امور اور بھرتیوں میں شفافیت یقینی بنائی جائے اور ملازمین کو بقایا تنخواہیں فوری ادا کی جائیں۔