ضلع حویلی اور دیگر تمام اضلاع میں آٹاکی فراہمی اور ترسیل کا نظام معمول کے مطابق جاری ہے،محکمہ خوراک

جمعہ 15 مئی 2026 14:10

مظفرآباد(اُردو پوائنٹ اخبارتازہ ترین - این این آئی۔ 15 مئی2026ء) محکمہ خوراک کی جانب سے ضلع حویلی میں آٹاکی کمی کے حوالہ سے سوشل میڈیا و پرنٹ میڈیا پر چلنے والی خبروں کی سختی سے تردید کرتے ہوئے ترجمان محکمہ خوراک نے واضح کیا کہ ضلع حویلی اور دیگر تمام اضلاع میں آٹاکی فراہمی اور ترسیل کا نظام معمول کے مطابق جاری ہے۔ محکمہ خوراک حکومت آزاد کشمیر کی ہدایات کی روشنی میں عوام الناس کو معیاری اور سستا آٹا فراہم کرنے کیلئے تمام تر وسائل بروئے کالا رہا ہے، جبکہ ضلع بھر میں قائم ڈپوؤں اور آٹا ڈیلیران کی مسلسل نگرانی بھی کی جارہی ہے تا کہ شہریوں کوکسی بھی قسم کی پریشانی یا دشواری کا سامنانہ کرنا پڑے۔

قابل ذکر بات یہ ہے کہ ضلع حویلی کی ضلع باغ میں مقیم آبادی کو بھی ضلع حویلی کے کوٹہ سے ہی آٹا فراہم کیا جا رہا ہے۔

(جاری ہے)

یہ امر بھی قابل ذکر ہے کہ ضلع حویلی سمیت ریاست کے تمام اضلاع میں عوام کو آٹا کی بلاتعطل فراہمی کو یقینی بنانے کیلئے محکمہ خوراک کا فیلڈ عملہ متحرک ہے اور عوامی سہولت کو اولین ترجیح دیتے ہوئے ہر ممکن اقدامات جاری رکھے ہوئے ہیں۔

محکمہ خوراک کی جانب سے روزانہ کی بنیاد پر آٹا کی دستیابی، ترسیل کی موثر مانیٹرنگ کی جارہی ہے جبکہ ذخیرہ اندوزی اور مصنوعی قلت پیدا کرنے والے عناصر کے خلاف سخت کارروائیاں بھی عمل میں لائی جارہی ہیں۔ آٹاکی کمی کے حوالہ سے آنے والی شکایات کی محکمہ خوراک سختی سے تردید کرتا ہے اور یہ واضح کرتا ہے کہ نہ صرف ضلع حویلی بلکہ آزاد کشمیر کے تمام اضلاع میں عوام الناس تک آٹاکی فراہمی احسن طریقہ سے جاری ہے، البتہ گزشتہ ماہ پاکستان میں نافذ لاک ڈاؤن و ٹرانسپورٹیشن کی کمی کی وجہ سے آٹا کی ترسیل میں عارضی تعطل پیدا ہوا تھا جواب ختم ہو چکا ہے اور اب ضلع حویلی یا دیگر کسی بھی ملحقہ علاقہ میں آٹاکی کوئی کمی نہ ہے۔