گرفتار 2 ملزمان انمول عرف پنکی کے لیے کوکین سپلائی کرتے تھے، رپورٹ

دونوں ملزمان اس وقت گرفتار کیا گیا ہے جب وہ کوکین سپلائی کرنے جا رہے تھے‘تحقیقاتی رپورٹ

پیر 18 مئی 2026 13:14

گرفتار 2 ملزمان انمول عرف پنکی کے لیے کوکین سپلائی کرتے تھے، رپورٹ

کراچی (اُردو پوائنٹ اخبارتازہ ترین - این این آئی۔ 18 مئی2026ء) کراچی کے پوش علاقوں میں 2 کوکین سپلائرز کی انویسٹی گیشن رپورٹ میڈیاکومل گئی ہے۔ایڈیشنل ڈسٹرکٹ اینڈ سیشن جج جنوبی کی عدالت میں پیش کی گئی رپورٹ کے مطابق گرفتار ملزمان انمول عرف پنکی کیلئے کوکین سپلائی کرتے تھے۔رپورٹ میں انکشاف کیا گیا کہ ملزمان کراچی کے پوش علاقوں میں نوجوان لڑکوں اور لڑکیوں سمیت کالجز اور یونیورسٹیز کے طلبہ کو منشیات فراہم کرتے تھے۔

تحقیقاتی رپورٹ کے مطابق دونوں ملزمان اس وقت گرفتار کیا گیا ہے جب وہ کوکین سپلائی کرنے جا رہے تھے۔ پولیس نے ملزمان کے قبضے سے 45 گرام کوکین اور ایک ڈیجیٹل ترازو بھی برآمد کیا تھا۔رپورٹ میں بتایا گیا کہ ملزم فرحان اس سے قبل بھی ڈیفنس اور بوٹ بیسن تھانوں میں منشیات سے متعلق مقدمات میں گرفتار ہو چکا ہے جبکہ ملزم فرحان کا نام مصطفی عامر قتل کیس کے ملزم ارمغان کی انٹروگیشن رپورٹ میں بھی آیا تھا۔

(جاری ہے)

پولیس کے مطابق ملزمان مبینہ طور پر سیاہ فام غیر ملکیوں سے منشیات حاصل کر کے کراچی کے پوش علاقوں میں سپلائی کرتے تھے۔ایس آئی یو پولیس نے دونوں ملزمان کو 6 مارچ 2025ء کو ڈیفنس کے علاقے سے گرفتار کیا تھاجبکہ ان کے خلاف ایس آئی یو صدر تھانے میں مقدمہ درج ہے۔رپورٹ کے مطابق کیس کو ایک سال گزرنے کے باوجود اب تک ملزمان پر فردِ جرم عائد نہیں ہوسکی، ملزم فرحان 5 جون 2025ء جبکہ ملزم عبدالمغنی 17 جولائی 2025ء کو ضمانت حاصل کر چکے ہیں۔