ٹرمپ کا غزہ فنڈز کیلئے 10 ارب ڈالرز دینے کا وعدہ وفا نہ ہوسکا

غزہ فنڈ کئی ماہ گزرنے کے باوجود تاحال خالی ،تعمیر نو کے منصوبے تعطل کا شکار ہیں،برطانوی اخبار

ہفتہ 30 مئی 2026 00:41

واشنگٹن (اُردو پوائنٹ اخبارتازہ ترین - این این آئی۔ 30 مئی2026ء) امریکی صدر ڈونلڈ ٹرمپ کا بورڈ آف پیس کے غزہ فنڈز کیلیے 10 ارب ڈالرز دینے کا وعدہ وفا نہ ہوسکا۔برطانوی میڈیا رپورٹ کے مطابق امریکی صدر ڈونلڈ ٹرمپ کے قائم کردہ بورڈ آف پیس کے غزہ فنڈز کیلیے اربوں ڈالرز کے وعدے کیے گئے۔غزہ فنڈ کئی ماہ گزرنے کے باوجود تاحال خالی ہے، جس کے باعث غزہ کی تعمیر نو کے منصوبے تعطل کا شکار ہیں۔

برطانوی اخبار کی رپورٹ کے مطابق صدر ٹرمپ نے بورڈ آف پیس کے لیے عالمی رہنماوں سے ایک ارب ڈالر کی تاحیات رکنیت فیس کا مطالبہ اور امریکا کی جانب سے 10 ارب ڈالر دینے کا اعلان کیا تھا۔رپورٹ کے مطابق رکن ممالک نی7 ارب اور امریکا نے 10 ارب ڈالر دینے کا وعدہ کیا تھا، عالمی بینک کے تحت قائم فنڈ میں ایک ڈالر بھی جمع نہیں ہوا۔

(جاری ہے)

برطانوی اخبار کی رپورٹ ک مطابق عطیات ورلڈبینک کے بجائے نجی بینک اکاونٹ کے ذریعے وصول کیے جارہے ہیں، ورلڈ بینک غزہ فنڈ کی مالی صورتحال سے عطیہ دہندگان اور بورڈ اراکین کو آگاہ کرنے کا پابند ہے۔

رپورٹ کے مطابق نجی بینک اکاونٹ کے لیے شفافیت سے متعلق کوئی آزادانہ تقاضے موجود نہیں، امریکی محکمہ خارجہ کی جانب سے 1 اعشاریہ 2 ارب ڈالر کی ممکنہ امداد بھی تاحال استعمال نہیں ہوئی۔اخبار کی رپورٹ کے مطابق بورڈ کے آپریشنز کے لیے مجوزہ 5 کروڑ ڈالر بھی ابھی تک جاری نہیں کیے گئے، غزہ میں سیکیورٹی اور تعمیر نو کیلیے ٹینڈر جاری کیے گئے مگر اب تک کوئی معاہدہ نہیں کیا گیا۔

رپورٹ کے مطابق منصوبے کی راہ میں بڑی رکاوٹوں میں حماس کا ہتھیار نہ ڈالنا، قانونی حیثیت کے سوالات اور زمینی انتظامی ڈھانچے کی کمی شامل ہیں۔برطانوی اخبار کی رپورٹ کے مطابق غزہ کی تعمیر نو کیلیے ایک ڈالر بھی خرچ نہیں ہوا، جس سے منصوبہ عملی طور پر غیر فعال ہے، امریکی قانون سازوں نے بورڈ آف پیس کی قانونی حیثیت اور آپریشنز پر سوالات اٹھائے ہیں، غزہ کی مکمل تعمیر نو کے لیے آئندہ دہائی میں 70 ارب ڈالر سے زائد درکار ہوں گے۔