امریکا اورمشرق وسطی کے 12 ممالک کا آبنائے ہرمز میں بلا رکاوٹ تجارت جاری رکھنے کیلئے مشترکہ کوششوں پر اتفاق

امریکا علاقائی سلامتی اور استحکام کے لیے خطے میں اپنے اتحادیوں کے ساتھ شانہ بشانہ کھڑا ہے،سربراہ سینٹکام ایڈمرل بریڈ کوپر

جمعرات 2 جولائی 2026 22:16

امریکا اورمشرق وسطی کے 12 ممالک کا آبنائے ہرمز میں بلا رکاوٹ تجارت جاری ..

واشنگٹن (اُردو پوائنٹ اخبارتازہ ترین - این این آئی۔ 02 جولائی2026ء) امریکا اور مشرق وسطی کے 12 ممالک نے آبنائے ہرمز میں بلارکاوٹ تجارت جاری رکھنے کیلئے مشترکہ کوششوں پر اتفاق کیا ہے۔امریکی سینٹرل کمانڈ کی قیادت میں بحرین میں 12 ممالک کے فوجی سربراہان کا علاقائی سکیورٹی اجلاس ہوا جہاں مشرق وسطی کی موجودہ سکیورٹی صورتحال اور دفاعی تعاون بڑھانے پر تبادلہ خیال کیا گیا۔

(جاری ہے)

اجلاس میں امریکا ، سعودی عرب ، قطر اور عمان سمیت مشرق وسطی کے 12 ممالک نے آبنائے ہرمز میں بلارکاوٹ تجارت جاری رکھنے کیلیے مشترکہ کوششوں پر اتفاق کیا جب کہ مشرق وسطی کی سکیورٹی صورتحال پر غور اور دفاعی تعاون کو مزید مضبوط بنانے کے عزم کا اظہار کیا گیا۔اجلاس میں بحرین، مصر، اردن، کویت، لبنان، عمان، قطر، سعودی عرب، شام، متحدہ عرب امارات اور یمن کے اعلی فوجی حکام نے شرکت کی۔ اس موقع پر سینٹ کام کے سربراہ ایڈمرل بریڈ کوپر نے کہا کہ امریکا علاقائی سلامتی اور استحکام کے لیے خطے میں اپنے اتحادیوں کے ساتھ شانہ بشانہ کھڑا ہے اور امریکا اپنے علاقائی شراکت دار وں کے ساتھ مل کر مشرقِ وسطی میں دنیا کا سب سے جدید اور فعال فضائی و میزائل دفاعی نظام چلا رہا ہے۔