Live Updates

10جون کو بامقصد بجٹ پیش کریں گے،پوری کوشش ہے کہ کوئی نیا ٹیکس نہ لگایا جائے

انفورسمنٹ اور ٹیکس نیٹ وسیع کرکے ٹیکس وصولی میں بہتری لائی جائے گی، اتحادی جماعتوں ، آئی ایم ایف اور اسٹیک ہولڈرز کو ساتھ لے کر چلنا ہے۔وزیرخزانہ محمد اورنگزیب

ثنااللہ ناگرہ بدھ 3 جون 2026 22:47

10جون کو بامقصد بجٹ پیش کریں گے،پوری کوشش ہے کہ کوئی نیا ٹیکس نہ لگایا ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 03 جون 2026ء ) وزیر خزانہ محمد اورنگزیب نے کہا ہے کہ آئندہ وفاقی بجٹ میں پوری کوشش ہے کہ کوئی نیا ٹیکس نہ لگایا جائے۔ انہوں نے بیان میں کہا کہ 10 جون کو بامقصد بجٹ پیش کریں گے۔ پوری کوشش ہے کہ بجٹ میں کوئی نیا ٹیکس نہ لگایا جائے، انفورسمنٹ اور ٹیکس نیٹ وسیع کرکے ٹیکس وصولی میں بہتری لائی جائے گی۔

آئی ایم ایف اتحادی اور اسٹیک ہولڈرز کو ساتھ لے کر چلنا ہے۔ آج کی ملاقات بہت مثبت رہی، ہفتے کے آخر میں مزید ملاقاتیں ہوں گی۔ وفاقی وزیرِ برائے خزانہ و محصولات سینیٹر محمد اورنگزیب نے عالمی بینک گروپ کی جانب سے پاکستان کے ساتھ دیرینہ اور پائیدار تعاون کو سراہتے ہوئے کہا کہ پاکستان کی افرادی قوت کو تیزی سے بدلتی عالمی معیشت کے تقاضوں کے مطابق تیار کرنا ضروری ہے، انہوں نے انسانی سرمائے کے اشاریوں کو بہتر بنانے، افرادی قوت کی شرکت کو مضبوط کرنے اور بد لتی لیبر مارکیٹ کی ضروریات کے مطابق نوجوانوں کوہنراور مہارتیں فراہم کرنے کی ضرورت پر زور دیا۔

(جاری ہے)

انہوں نے یہ بات بدھ کویہاں عالمی بینک گروپ کے وفدسے ملاقات میں کہی جس کی قیادت انسانی ترقی (صحت، تعلیم اور سماجی تحفظ) کی نائب صدر ممتامر تھی کر رہی تھیں۔ عالمی بینک کی پاکستان میں کنٹری ڈائریکٹر بولور ماآمگا بازر، انسانی ترقی کی علاقائی ڈائریکٹرکیکواینوئی، ہیلتھ پریکٹس مینیجشیرین ورکی اور آئی ایف سی کے ڈائریکٹر سائمن اینڈریوبھی وفدمیں شامل تھے۔

وزیرخزانہ نے وفد کا خیرمقدم کرتے ہوئے عالمی بینک گروپ کی جانب سے پاکستان کے ساتھ مسلسل شراکت داری کو سراہا اور ملک کی ترقیاتی اور اصلاحات کے ترجیحات میں گروپ کے تعاون کا اعتراف کیا۔ انہوں نے کہا کہ پاکستان نے معاشی استحکام کی بحالی کے حوالے سے اہم پیشرفت کی ہے اور حکومت کی توجہ اب صحت، تعلیم، مہارتوں کی ترقی اور سماجی تحفظ میں ہدف پرمبنی سرمایہ کاری کے ذریعے سماجی اور انسانی ترقی کے نتائج بہتر بنانے پر مرکوز ہے۔

انہوں نے پاکستان کے لئے ورلڈ بینک کے طویل المدتی کنٹری پارٹنرشپ فریم ورک کے تحت قابلِ پیمائش نتائج اور مؤثر عمل درآمد پر مضبوط توجہ برقرار رکھنے کی اہمیت پر زور دیا۔وزیرِ خزانہ نے کہاکہ پاکستان کی بڑی اور نوجوان آبادی ایک اہم موقع اور اہم پالیسی ترجیح ہے ، ضرورت اس امرکی ہے کہ انسانی سرمائے کے اشاریوں کو بہتر بنانے، افرادی قوت کی شرکت کو مضبوط کرنے، اور نوجوانوں کو بدلتی لیبر مارکیٹ کی ضروریات کے مطابق مہارتیں فراہم کی جائیں ۔