بنگلہ دیش کے خلیل الرحمٰن یو این جنرل اسمبلی کے 81 ویں صدر منتخب

یو این بدھ 3 جون 2026 23:45

اسلام آباد (اُردو پوائنٹ ۔ UN اردو۔ 03 جون 2026ء) بنگلہ دیش کے وزیر خارجہ خلیل الرحمٰن قبرص کے آندریاس کاکورس کو شکست دے کر اقوام متحدہ کی جنرل اسمبلی کے 81ویں اجلاس کے صدر منتخب ہو گئے ہیں۔

جنرل اسمبلی کی سالانہ صدارت کے لیے ہونے والی خفیہ رائے شماری میں خلیل الرحمٰن نے 99 ووٹ حاصل کیے جبکہ کاکورس کو 91 ممالک کی حمایت حاصل ہو سکی۔ مجموعی طور پر 190 ارکان نے حق رائے دہی استعمال کیا۔

اس موقع پر نہ تو کوئی ووٹ مسترد ہوا اور نہ ہی کسی رکن نے ووٹ دینے سے گریز کیا۔

جنرل اسمبلی کی صدارت باری کی بنیاد پر رکن ممالک کے پانچ علاقائی گروہوں میں سے کسی ایک ملک کو ملتی ہے۔ ستمبر سے شروع ہونے والے 81 ویں اجلاس کے لیے ایشیا اور الکاہل خطے سے صدر کا انتخاب ہونا تھا۔

خلیل الرحمٰن 8 ستمبر سے مدت صدارت کا آغاز کریں گے۔

(جاری ہے)

ان کے دور میں موجودہ سیکرٹری جنرل انتونیو گوتیرش کے جانشین کے انتخاب کا عمل بھی شروع ہو گا جن کے عہدے کی مدت رواں سال 31 دسمبر کو ختم ہو رہی ہے۔

عالمی تعاون کے فروغ کا عزم

خلیل الرحمٰن سفارت کاری اور کثیرالفریقی امور میں 40 سال سے زیادہ تجربے کے حامل ہیں۔ وہ رواں سال فروری میں بنگلہ دیش کے وزیر خارجہ مقرر ہوئے تھے۔ اس سے قبل وہ قومی سلامتی کے مشیر اور روہنگیا مسئلے پر حکومت کے اعلیٰ نمائندے کے طور پر بھی خدمات انجام دے چکے ہیں۔

1979 میں بنگلہ دیش کی سفارتی سروس میں شمولیت اختیار کرنے والے خلیل الرحمٰن نے نیویارک اور جنیوا میں اقوام متحدہ کے دفاتر میں بھی اہم ذمہ داریاں نبھائی ہیں۔

انہوں نے 'اعتماد کی بحالی، تبدیلی کا موثر انتظام: سب کے لیے مفید اقوام متحدہ' کو اپنی صدارت کا مرکزی موضوع قرار دیا ہے۔

سیکرٹری جنرل انتونیو گوتیرش نے اس موضوع کو کثیرالفریقی نظام کے لیے حوصلہ افزا دعوت عمل قرار دیتے ہوئے کہا کہ دنیا کو تنازعات، تقسیم، بڑھتی ہوئی عدم مساوات اور موسمیاتی بحران کا سامنا ہے۔ پائیدار ترقی کے اہداف (ایس ڈی جی) کے حصول کی رفتار سست پڑ گئی ہے، انسانی امداد اور ترقیاتی منصوبوں کے لیے مالی وسائل کم ہو رہے ہیں جبکہ بین الاقوامی ادارے موجودہ دنیا کے تقاضوں سے ہم آہنگ نہیں ہیں۔

ایسے حالات میں یہ موضوع عالمی تعاون کو مضبوط بنانے کے عزم کی عکاسی کرتا ہے۔

عاجزی اور احترام

خلیل الرحمٰن نے اپنی کامیابی کے بعد اسمبلی سے خطاب کرتے ہوئے کہا کہ وہ اس ذمہ داری کو عاجزی اور احترام کے ساتھ قبول کر رہے ہیں۔

اقوام متحدہ اپنی 9ویں دہائی کا آغاز ایسے وقت کر رہا ہے جب اس پر اعتماد کو کئی حوالوں سے مسائل کا سامنا ہے جن کے نتیجے میں لوگوں کا یہ یقین کمزور پڑ رہا ہے کہ اقوام متحدہ اپنے وعدوں کو پورا کرنے کی صلاحیت رکھتا ہے۔

نومنتخب صدر نے کہا کہ بنگلہ دیش کے امن کاری سے متعلق تجربے کی روشنی میں وہ پیشگی سفارت کاری، امن سازی اور شہریوں کے تحفظ کو یقینی بنانے کی کوشش کریں گے۔

انہوں نے ترقیاتی منصوبوں کے لیے مالی وسائل کی کمی دور کرنے، عالمی ڈیجیٹل معاہدے پر عملدرآمد کو آگے بڑھانے اور بڑھتے ہوئے دباؤ کے ماحول میں اقوام متحدہ کی کارکردگی کو موثر بنانے کی ضرورت پر بھی زور دیا۔

ان کا کہنا تھا کہ وہ رکن ممالک کے درمیان پل کا کردار ادا کریں گے، تمام ارکان سے مشاورت کریں گے اور بڑھتی ہوئی عالمی تقسیم کے باوجود مشترکہ نکات تلاش کرنے کی کوشش کریں گے۔

اقوام متحدہ پر دباؤ

جنرل اسمبلی کی موجودہ صدر اینالینا بیئربوک نے اسمبلی سے خطاب کرتے ہوئے کہا کہ اقوام متحدہ کو مخالفت اور شدید دباؤ کا سامنا ہے۔ عالمی اتفاق رائے پیدا کرنا پہلے سے کہیں زیادہ دشوار ہو گیا ہے اور اقوام متحدہ کے منشور کا دفاع اب روزمرہ کی ضرورت بن چکا ہے۔

انہوں نے خبردار کیا کہ آنے والا سال بھی آسان نہیں ہو گا۔

جنرل اسمبلی کو مستقبل کے معاہدے پر عملدرآمد، اقوام متحدہ میں اصلاحات کے لیے 'یو این 80' اقدام کو آگے بڑھانے اور بڑھتی ہوئی جغرافیائی و سیاسی تقسیم کے ماحول میں اپنا کام جاری رکھنا ہو گا۔