Live Updates

بلوچستان کے مختلف اضلاع میں فی لیٹر پیٹرول 500 روپے تک فروخت ہونے لگا، متعدد فلنگ اسٹیشنز عارضی بند ہوگئے

بلوچستان میں پٹرولیم مصنوعات کی شدید قلت پیدا ہوگئی، سپلائی میں تعطل باعث ٹرانسپورٹ اور روزمرہ کا نظام زندگی شدید متاثر ہوا ہے

ثنااللہ ناگرہ جمعرات 4 جون 2026 19:57

کوئٹہ (اردوپوائنٹ اخبار تازہ ترین۔ انٹرنیشنل پریس ایجنسی ۔ 04 جون 2026ء ) بلوچستان کے مختلف اضلاع میں فی لیٹر پیٹرول 500 روپے تک فروخت ہونے لگا، متعدد فلنگ اسٹیشنز عارضی طور پر بند ہوگئے۔ میڈیا کے مطابق بلوچستان میں پیٹرول اور ڈیزل کے بحران کے باعث ایک لیٹر پیٹرول یا ڈیزل 500 روپے میں فروخت ہونے لگا۔ میڈیا رپورٹ کے مطابق کوئٹہ میں پیٹرول اورڈیزل کی قلت کے باعث مختلف علاقوں میں ابھی بھی کچھ پیٹرول پمپس بند پڑے ہیں اور جو پیٹرول پمپوں کھلے ہیں ان پرشہریوں کارش بڑھ گیا ہے اور لمبی لمبی قطار یں نظر آرہی ہیں جس سے شہری ذہنی کو فت کا شکار ہیں۔

اندرون صوبے کے علاقوں میں پیٹرول کی قلت کا بحران شدت اختیار کرگیا ہے ۔ جبکہ نوشکی ، خاران ،لورالائی میں فی لیٹر قیمت 500 روپے پہنچ گئی ہے ۔

(جاری ہے)

نیوزایجنسی کے مطابق صدرپیٹرولیم ڈیلرز ایسوسی ایشن قیام الدین آغا کے مطابق شکار پور سے پیٹرول کی فراہمی میں اضافہ کردیا گیا ہے ایک دو روز میں صورتحال معمول پر آئے گی۔ڈی سی کوئٹہ نے کہا کہ ایرانی پیٹرول کی سپلائی بند ہونے سے پیٹرول پمپس پر رش بڑھ گیا ہے ، آج کوئٹہ کے پیٹرول پمپوں پر 6 لاکھ لیٹر پیٹرول سپلائی کیا گیا ہے۔

دوسری جانب بلوچستان بار کونسل کے سابق وائس چیئرمین اور ممبر بلوچستان بار کونسل راحب خان بلیدی ایڈووکیٹ نے کہا کہ کوئٹہ سمیت بلوچستان بھر میں پیٹرول اور ڈیزل کی شدید قلت موجودہ حکومت کی نااہلی اور بدانتظامی کی انتہا ہے۔ انہوں نے اپنے بیان میں کہا کہ بلوچستان کے دور دراز علاقوں میں پیٹرول 800 روپے فی لیٹر تک فروخت ہو رہا ہے، جس کے باعث رکشہ، گڈز اور پبلک ٹرانسپورٹ کے کرایوں میں نمایاں اضافہ ہو چکا ہے۔

ان کا کہنا تھا کہ شہری گھنٹوں انتظار کے باوجود پیٹرول حاصل نہیں کر پا رہے جبکہ بارڈر کی بندش سے کاروباری طبقہ بھی شدید متاثر ہوا ہے۔ راحب خان بلیدی نے کہا کہ بے روزگاری، غربت، کرپشن اور لاقانونیت میں اضافہ ہو رہا ہے اور حکومت عوامی مسائل کے حل میں مکمل طور پر ناکام ہو چکی ہے۔ انہوں نے مطالبہ کیا کہ حکومت فوری طور پر کوئٹہ سمیت بلوچستان بھر میں پیٹرول اور ڈیزل کی قلت کا نوٹس لے اور عوام کو ریلیف فراہم کرے۔