Live Updates

امریکہ اور ایران کے درمیان تازہ جھڑپوں پر یو این چیف کو تشویش

یو این جمعرات 4 جون 2026 19:45

اسلام آباد (اُردو پوائنٹ ۔ UN اردو۔ 04 جون 2026ء) اقوام متحدہ کے سیکرٹری جنرل انتونیو گوتیرش نے گزشتہ رات امریکہ اور ایران کی ایک دوسرے کے خلاف عسکری کارروائیوں اور ایران کی جانب سے کویت اور بحرین پر حملوں کی اطلاعات کو انتہائی تشویش ناک قرار دیا ہے۔

اقوام متحدہ کے ترجمان سٹیفن ڈوجیرک نے نیویارک میں معمول کی پریس بریفنگ کے موقع پر کہا ہے کہ سیکرٹری جنرل کو ان حملوں میں شہری ہلاکتوں کی اطلاعات پر بھی سخت تشویش ہے۔

انہوں نے تمام فریقین پر زور دیا ہے کہ وہ انتہائی ضبط و تحمل کا مظاہرہ کریں اور کسی بھی ایسی کشیدگی سے گریز کریں جو سفارتی کوششوں کو نقصان پہنچا سکتی ہو۔ تمام ریاستوں کی خودمختاری اور علاقائی سالمیت کا مکمل احترام کیا جانا لازم ہے۔

پاکستانی ثالثی کی حمایت

سیکرٹری جنرل نے شہری تنصیبات اور بنیادی ڈھانچے پر ہونے والے تمام حملوں کی مذمت کرتے ہوئے یاد دلایا ہے کہ بین الاقوامی انسانی قانون کے تحت شہری مقامات اور تنصیبات کو نشانہ بنانا قطعی طور پر ممنوع ہے۔

(جاری ہے)

انہوں نے تنازع کے تمام فریقین پر زور دیا ہے کہ وہ بین الاقوامی انسانی قانون اور دیگر عالمی قوانین کے تحت اپنی ذمہ داریوں کی پاسداری کریں اور شہریوں کے تحفظ کے لیے ہر ممکن احتیاطی اقدامات اٹھائیں۔

سیکرٹری جنرل نے پاکستان سمیت مختلف ممالک کی قیادت میں جاری ثالثی اور مصالحتی کوششوں کی مکمل حمایت کا اعادہ کرتے ہوئے فریقین پر زور دیا ہے کہ وہ سفارتی اقدامات میں تعمیری اور نیک نیتی پر مبنی انداز میں شریک ہوں۔