15 جون کے بعد ایم ٹیگ کے بغیر کسی بھی موٹروے پر داخلہ نہیں ملے گا

پرانے ایم ٹیگز تبدیل کروانے کیلئے یکم جولائی کی حتمی تاریخ جاری، غفلت پر ڈبل فیس اور بلاکنگ کا سامنا کرنا پڑے گا

ساجد علی جمعرات 11 جون 2026 12:08

15 جون کے بعد ایم ٹیگ کے بغیر کسی بھی موٹروے پر داخلہ نہیں ملے گا

اسلام آباد (اُردو پوائنٹ اخبارتازہ ترین۔ 11 جون2026ء) موٹروے کا انتظام سنبھالنے والی کمپنی ’ون نیٹ ورک‘ نے ملک بھر کی تمام موٹرویز پر سفر کرنے والے شہریوں کے لیے ایم ٹیگ کے نفاذ کی حتمی تاریخ اور پرانے ٹیگز کو بلاک کرنے کی آخری ڈیڈ لائنز کا باقاعدہ شیڈول جاری کردیا۔ ون نیٹ ورک کی جانب سے جاری کردہ تازہ ترین ایڈوائزری کے مطابق حتمی ڈیڈ لائن 15 جون 2026ء ہے، اب تاریخوں میں کوئی نرمی نہیں کی جائے گی، 15 جون 2026ء کی آخری تاریخ کے بعد پاکستان کی کسی بھی موٹروے پر ایم ٹیگ کے بغیر گاڑیوں کا داخلہ مکمل طور پر بند کر دیا جائے گا،مسافروں کو سختی سے ہدایت کی گئی ہے کہ وہ اس تاریخ سے پہلے اپنی رجسٹریشن ہر صورت مکمل کر لیں تاکہ ٹول پلازوں پر روکے جانے سے بچ سکیں۔

بتایا گیا ہے کہ ایم ٹیگ کی مفت تبدیلی کے حوالے سے اہم ٹائم لائن گزر چکی ہے جس کے بعد اب فیس لاگو ہو چکی ہے، کیوں کہ 5 سال سے پرانے ایم ٹیگز کو بالکل مفت تبدیل کرنے کی آخری تاریخ 31 مئی 2026ء تھی جو اب ختم ہو چکی ہے، یکم جون سے پرانے ایم ٹیگ کی تبدیلی پر 150 روپے کی فیس نافذ العمل ہو چکی ہے اور اب شہریوں کو یہ رقم ادا کرنی ہوگی۔

(جاری ہے)

معلوم ہوا ہے کہ ایسے ڈرائیورز جنہوں نے ابھی تک اپنے 5 سال سے زائد پرانے ایم ٹیگز تبدیل نہیں کروائے، ان کے لیے کمپنی نے فائنل وارننگ جاری کر دی ہے، اگر پرانے ایم ٹیگز کو مقررہ وقت کے اندر تبدیل نہ کیا گیا، تو یکم جولائی 2026ء کو یہ تمام ٹیگز ہمیشہ کے لیے بلاک کردیئے جائیں گے، یکم جولائی کی ڈیڈ لائن مس ہونے کے بعد موٹرویز پر سفر کرنے والوں کو نیا ایم ٹیگ حاصل کرنے کے لیے دگنی فیس یعنی 300 روپے ادا کرنا ہوں گے اور ان کا پرانا بیلنس بھی معطل ہو سکتا ہے۔