Live Updates

اسد قیصر کا حکومت سے ٹوبیکو کی فصل پر ٹیکس ختم کرنے اور سگریٹ کی ڈبی پرزیادہ سے زیادہ ٹیکس لگانےکا مطالبہ

ٹوبیکو فصل پر 390 فیصد ٹیکس کسان کو متاثر کرتا ہے، ٹوبیکو ٹیکس بڑھانے سے ریونیو آمدن 294 ارب سے کم ہو کر 165 ارب ہوگئی ہے، مطالبہ ہے ٹوبیکو کو باقاعدہ زرعی فصل کا درجہ دیا جائے اور ٹیکس ختم کیا جائے۔ اسد قیصر

ثنااللہ ناگرہ ہفتہ 20 جون 2026 20:53

اسد قیصر کا حکومت سے ٹوبیکو کی فصل پر ٹیکس ختم کرنے اور سگریٹ کی ڈبی ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 20 جون 2026ء ) پی ٹی آئی کے رہنماء اسد قیصر نے کہا ہے کہ حکومت سگریٹ کی ڈبی پر جتنا مرضی ٹیکس لگا دے لیکن فصل پر390 فیصد ٹیکس لگانا کسان کے ساتھ زیادتی ہے، ٹوبیکو ٹیکس بڑھانے سے ریونیو آمدن 294 ارب سے کم ہو کر 165 ارب ہوگئی ہے، مطالبہ ہے ٹوبیکو کو باقاعدہ زرعی فصل کا درجہ دیا جائے اور ٹیکس ختم کیا جائے۔

ایکس کے مطابق اسد قیصر نے ایوان میں اظہار خیال کرتے ہوئے کہا کہ سینیٹ کی جانب سے سالانہ بجٹ 2026-27 پر یہ سفارش کی گئی ہے کہ سگریٹ اور تمباکو کی مصنوعات پر سالانہ ٹوبیکو ٹیکس میں اضافہ افراطِ زر اور آمدنی میں اضافے سے زیادہ ہونا چاہیے۔ یہ بالکل درست بات ہے۔ اس کا مقصد یہ ہے کہ ٹوبیکو کی جو فائنل پروڈکٹ، یعنی سگریٹ کی ڈبی ہے، اس پر آپ ٹیکس لگائیں، بیشک جتنا لگانا چاہیں لگائیں۔

(جاری ہے)

لیکن جب آپ فصل پر ٹیکس لگاتے ہیں اور اس پر 390 فیصد ٹیکس عائد کرتے ہیں تو اس سے سب سے زیادہ متاثر کسان ہوتا ہے۔ اس لیے ہماری تجویز یہ ہے کہ ٹوبیکو کی فائنل پروڈکٹ، یعنی سگریٹ، پر آپ جتنا ٹیکس لگانا چاہتے ہیں لگا لیں، اس پر ہمیں کوئی اعتراض نہیں۔

یہاں ایک محترمہ نے ٹوبیکو کو ڈرگ قرار دیا۔ خیبر پختونخوا اسمبلی کی متفقہ قرارداد ہم نے آپ کو بھیجی تھی جس میں مطالبہ کیا گیا تھا کہ ٹوبیکو کو باقاعدہ زرعی فصل کا درجہ دیا جائے۔

اس لیے ہم سمجھتے ہیں کہ ٹوبیکو پر عائد کیا گیا 390 فیصد ٹیکس مؤثر ثابت نہیں ہوا، بلکہ اس کی وجہ سے آپ کی ریونیو 294 ارب سے کم ہو کر 165 ارب ہو گئی۔ لہٰذا آپ سگریٹ یا اس کی ڈبی پر جتنا ٹیکس لگانا چاہتے ہیں لگا لیں، لیکن ٹوبیکو، جو ایک اصل زرعی فصل ہے اور ہمارے علاقے کی معیشت کی ریڑھ کی ہڈی ہے، اس پر عائد ٹیکس ختم کیا جائے۔