گلگت بلتستان میں حکومت سازی میں استحکام پاکستان پارٹی، پیپلز پارٹی کا ساتھ دیگی، مرکزی و صوبائی قیادت کااعلان

اتوار 21 جون 2026 18:30

گلگت (اُردو پوائنٹ اخبارتازہ ترین - این این آئی۔ 21 جون2026ء) پاکستان پیپلز پارٹی گلگت بلتستان اور استحکام پاکستان پارٹی کی صوبائی و مرکزی قیادت نے اعلان کیا ہے کہ گلگت بلتستان میں حکومت سازی کے عمل میں استحکام پاکستان پارٹی، پاکستان پیپلز پارٹی کے ساتھ اتحاد میں شامل ہوگی۔میڈیا سے گفتگو کرتے ہوئے دونوں جماعتوں کے رہنماؤں نے کہا کہ باہمی نشستوں اور تفصیلی مشاورت کے دوران اس بات پر اتفاق کیا گیا کہ حکومت سازی کے عمل میں استحکام پاکستان پارٹی، پاکستان پیپلز پارٹی کا ساتھ دے گی۔

اس موقع پر مرکزی جنرل سیکرٹری سید نیئر حسین بخاری، مرکزی رہنما قمر الزماں کائرہ ' صوبائی صدر امجد حسین ایڈووکیٹ اور صوبائی تنظیم کے عہدیداران شریک ہوئے۔ استحکام پاکستان پارٹی گلگت بلتستان کے صدر حاجی گلبر خان نے کہا کہ دونوں جماعتوں کے درمیان دیگر معاملات اور اہم امور وفاقی سطح پر مرکزی قیادت طے کرے گی۔

(جاری ہے)

پاکستان پیپلز پارٹی گلگت بلتستان کے صوبائی صدر امجد حسین ایڈووکیٹ نے میڈیا سے گفتگو کرتے ہوئے کہا کہ گلگت بلتستان میں پاکستان پیپلز پارٹی، مسلم لیگ (ن) اور استحکام پاکستان پارٹی کا خطے کی تعمیر و ترقی اور عوام کو درپیش مسائل کے حل کے لیے ایک پلیٹ فارم پر آنا ایک مثبت پیشرفت ہے۔

انہوں نے امید ظاہر کی کہ اس اتحاد کے نتیجے میں گلگت بلتستان ترقی اور خوشحالی کی راہ پر گامزن ہوگا۔انہوں نے واضح کیا کہ حکومت سازی اور دیگر معاملات پر باضابطہ عمل پیر کے روز سے شروع کیا جائے گا۔