بھارت کشمیریوں کی زمینوں، جائیدادوںپر قبضہ کر کے انہیں بنیادی حقوق سے محروم کرنے لگی

پیر 29 جون 2026 17:24

اسلام آباد(اُردو پوائنٹ اخبارتازہ ترین - این این آئی۔ 29 جون2026ء) کل جماعتی حریت کانفرنس کی آزاد جموں و کشمیر شاخ کے رہنماؤں نے کہا ہے کہ بی جے پی کی زیرِ قیادت ہندوتوا حکومت مقبوضہ جموں و کشمیر کے لوگوں کی زمینوں، جائیدادوں اور قدرتی وسائل پر قبضہ کر کے انہیں بنیادی حقوق سے محروم کر رہی ہے۔ کشمیرمیڈیاسروس کے مطابق کل جماعتی حریت کانفرنس کی آزاد جموں و کشمیر شاخ کے رہنماؤں شیخ محمد یعقوب ، انجینئر مشتاق محمود اور مشتاق احمد بٹ نے اسلام آباد سے جاری ایک مشترکہ بیان میں کہا کہ 5 اگست 2019 کو بھارت کے غیر قانونی اور یکطرفہ اقدامات کے بعد مقبوضہ جموں و کشمیر کی صورتحال انتہائی سنگین ہو چکی ہے۔

انہوں نے کہا کہ بھارت کشمیری عوام کی جائز اور پرامن تحریکِ آزادی کو طاقت کے ذریعے دبانے میں ناکام رہا ہے اوروہ اپنے مذموم عزائم میں کبھی کامیاب نہیں ہوگا۔

(جاری ہے)

حریت رہنماؤں نے کہا کہ بھارت اقوام متحدہ کے چارٹر اور سلامتی کونسل کی قراردادوں کی مسلسل خلاف ورزی کر رہا ہے، جن میں جموں و کشمیر کی متنازعہ حیثیت اور کشمیری عوام کے ناقابلِ تنسیخ حقِ خودارادیت کو تسلیم کیا گیا ہے۔

انہوں نے کہا کہ نریندر مودی کی فسطائی حکومت نے مقبوضہ جموں و کشمیر میں ظلم و جبر، انسانی حقوق کی پامالیوں، جبری گرفتاریوں اور سیاسی انتقام کا سلسلہ تیز کر دیا ہے۔ ان کا کہنا تھا کہ مودی کے اقتدار میں آنے کے بعد نہ صرف مقبوضہ جموں و کشمیر بلکہ بھارت بھر میں مسلمانوں اور دیگر مذہبی اقلیتوں کے خلاف تشدد، نفرت انگیز اور امتیازی سلوک میں نمایاں اضافہ ہوا ہے۔

حریت رہنماؤں نے کہا کہ بھارت کشمیری عوام کی نسل کشی کرکے مقبوضہ علاقے میں آبادی کا تناسب تبدیل کرنے کے مذموم منصوبے پر عمل پیرا ہے جو بین الاقوامی قوانین اور چوتھے جنیوا کنونشن کی کھلی خلاف ورزی ہے۔انہوں نے کہا کہ بھارت کے تمام تر مظالم، جبر اور ریاستی دہشت گردی کے باوجود کشمیری عوام کے حوصلے بلند ہیں اور وہ اپنے ناقابلِ تنسیخ حقِ خودارادیت کے حصول اور تحریکِ آزادی کو اس کے منطقی انجام تک پہنچانے کے لیے پرعزم ہیں۔

حریت رہنماؤں نے اقوام متحدہ، انسانی حقوق کی عالمی تنظیموں اور عالمی برادری سے مطالبہ کیا کہ وہ مقبوضہ جموں و کشمیر میں بھارتی فورسز کی جانب سے جاری انسانی حقوق کی سنگین خلاف ورزیوں کا فوری نوٹس لیں اور مسئلہ کشمیر کو اقوام متحدہ کی سلامتی کونسل کی متعلقہ قراردادوں کے مطابق حل کرانے کے لیے بھارت پر دباؤ ڈالیں۔