Live Updates

فی لیٹر پیٹرول پر 118.76 روپے ،ہائی اسپیڈ ڈیزل پر 110.65 روپے لیوی، ٹیکس اور مارجنز مقرر

ایک لیٹر پیٹرول کی بنیادی لاگت 178 روپے 77 پیسے بنتی ،حکومت نے شہریوں کے لئے فی لیٹر قیمت 297 روپے 53 پیسے مقرر کی ہے. رپورٹ

میاں محمد ندیم اتوار 5 جولائی 2026 17:33

فی لیٹر پیٹرول پر 118.76 روپے ،ہائی اسپیڈ ڈیزل پر 110.65 روپے لیوی، ٹیکس اور ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔05 جولائی ۔2026 ) حکومت کی جانب سے ایک لیٹر پیٹرول پر مجموعی طور پر 118.76 روپے جبکہ ایک لیٹر ہائی اسپیڈ ڈیزل پر 110.65 روپے لیوی، ٹیکس اور مارجنز وصول کیے جا رہے ہیں دستاویزات کے مطابق ایک لیٹر پیٹرول کی بنیادی لاگت 178 روپے 77 پیسے بنتی ہے تاہم حکومت نے شہریوں کے لئے فی لیٹر قیمت 297 روپے 53 پیسے مقرر کی ہے.

پیٹرول پر 70 روپے 36 پیسے پیٹرولیم لیوی، 5 روپے کلائمیٹ سپورٹ لیوی، 19 روپے 33 پیسے کسٹمز ڈیوٹی، 6 روپے 86 پیسے ان لینڈ فریٹ ایکولائزیشن مارجن، 7 روپے 87 پیسے آئل مارکیٹنگ کمپنیوں کا مارجن اور 8 روپے 64 پیسے ڈیلرز مارجن شامل ہے.

(جاری ہے)

اسی طرح فی لیٹر ہائی اسپیڈ ڈیزل کی بنیادی لاگت 198 روپے 85 پیسے ہے جبکہ حکومت نے شہریوں کے لیے اس کی قیمت 309 روپے 50 پیسے فی لیٹر مقرر کی ہے دستاویز کے مطابق ہائی اسپیڈ ڈیزل پر مجموعی طور پر 110 روپے 65 پیسے کی لیوی، ٹیکسز اور مختلف مارجنز وصول کیے جا رہے ہیں.

ادھر ماہرین کا کہنا ہے کہ اتنے بڑی شرح پر ٹیکس حکومتی نااہلی کا کھلا اظہار ہیں انہوں نے کہاکہ بجلی کے بلوں میں فی یونٹ قیمت سے بھی کئی گنا ٹیکس ہیں‘یہی معاملہ گیس میں نظرآتا ہے حکومت ملک کے امیروں اور جاگیرداروںسے ٹیکس لینے کی بجائے سارا بوجھ صارفین پر ڈال رہی ہے جس سے شہری علاقوں کے رہائشی سب سے زیادہ متاثرہورہے ہیں. انہوں نے کہاکہ حکمران حکومتی اخراجات‘سرکاری اداروں کے اخراجات‘اعلی عدلیہ اور اسمبلیوں کے اخراجات کم کرنے کو تیار نہیں بلکہ ان میں مسلسل اضافہ کیا جارہا ہے جبکہ شہریوں سے یوٹیلٹی بلوں‘اشیاءضروریہ ‘تیل‘ایل پی جی سمیت دیگر بنیادی ضرورت کی چیزوں پر ٹیکس بڑھا کر خسارے پورے کرنے کی کوشش کی جارہی ہے.

انہوں نے کہاکہ یہ ایک ناکام اور نااہل طرزحکمرانی کی نشانیاں ہیں‘حکومت پہلے اپنے اور سرکاری اداروں کے اخراجات کو نصف تک لے کر آئے ا س کے بعد عوام پر بوجھ ڈالا جائے مگر یہاں مسلسل عوام پر بوجھ ڈالا جارہا ہے جس کے نتائج تباہ کن ہونگے.