ٓ06 سے 10 جولائی: شمالی علاقوں میں تیز بارشوں کی پیشگوئی، این ڈی ایم اے نے الرٹ جاری کر دیا

بڑے دریائی سیلاب کا خطرہ نہیں، تاہم پہاڑی ندی نالوں، شہری علاقوں میں اربن فلڈنگ اور لینڈ سلائیڈنگ کا خدشہ

اتوار 5 جولائی 2026 22:00

ٓ06 سے 10 جولائی: شمالی علاقوں میں تیز بارشوں کی پیشگوئی، این ڈی ایم اے ..

Wاسلام آباد(اُردو پوائنٹ اخبارتازہ ترین - آن لائن۔ 05 جولائی2026ء) نیشنل ڈیزاسٹر مینجمنٹ اتھارٹی (این ڈی ایم ای) کے نیشنل ایمرجنسیز آپریشن سینٹر (این ای او سی) نے 06 سے 10 جولائی 2026 تک کے لیے موسمی صورتحال اور دریاؤں میں پانی کے بہاؤ سے متعلق پیشگی جائزہ جاری کرتے ہوئے خبردار کیا ہے کہ 06 جولائی سے شمالی پاکستان میں ایک فعال موسمی نظام داخل ہونے کا امکان ہے، جس کے باعث مختلف علاقوں میں گرج چمک کے ساتھ بارشیں متوقع ہیں۔

این ڈی ایم اے کے مطابق 06 جولائی سے آزاد کشمیر، بالائی خیبرپختونخوا، اسلام آباد، پوٹھوہار اور شمال مشرقی پنجاب میں بارشوں کا سلسلہ شروع ہونے کا امکان ہے، جبکہ 07 سے 10 جولائی کے دوران دریائے سندھ، جہلم، چناب، راوی اور ستلج کے بالائی ملحقہ علاقوں میں وقفے وقفے سے بارش اور بعض مقامات پر موسلادھار بارش ہو سکتی ہے۔

(جاری ہے)

جاری کردہ رپورٹ کے مطابق 07 جولائی کو اسلام آباد، پوٹھوہار، آزاد کشمیر، گلگت بلتستان، خیبرپختونخوا، شمالی پنجاب اور شمالی بلوچستان میں بارشوں کی شدت میں اضافے کی توقع ہے، جس کے باعث تربیلا اور منگلا ڈیم میں پانی کی آمد میں معمولی اضافہ متوقع ہے۔

اسی دوران دریائے سندھ، جہلم، چناب، راوی اور ستلج میں پانی کے بہاؤ میں بھی معمولی اضافہ ہو سکتا ہے۔این ڈی ایم اے نے واضح کیا ہے کہ موجودہ صورتحال میں بڑے پیمانے پر دریائی سیلاب کا کوئی خطرہ نہیں، تاہم پہاڑی ندی نالوں اور چھوٹے برساتی نالوں میں اچانک طغیانی، حساس بالائی علاقوں میں مقامی سیلاب، جبکہ شدید بارشوں کے دوران شہری علاقوں میں اربن فلڈنگ اور نشیبی علاقوں کے زیر آب آنے کا خدشہ موجود ہے۔

ادارے نے مزید خبردار کیا ہے کہ خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ اور مٹی کے تودے گرنے کے واقعات بھی پیش آ سکتے ہیں۔این ڈی ایم اے نے تمام متعلقہ اداروں کو الرٹ رہنے، بروقت حفاظتی اقدامات یقینی بنانے اور شہریوں سے اپیل کی ہے کہ وہ موسمی صورتحال، سفری ہدایات اور سرکاری الرٹس پر عمل کریں۔ شہریوں کو تازہ ترین موسمی معلومات، ممکنہ خطرات اور حفاظتی تدابیر سے آگاہی کے لیے **پاک این ڈی ایم اے ڈیزاسٹر الرٹ موبائل ایپ** سے بھی راہنمائی حاصل کرنے کی ہدایت کی گئی ہے۔