اسلام آباد میں خاتون کو بچانے کے دوران ایئرفورس افسر کی شہادت، فائرنگ کرنے والا ملزم گرفتار

یہ افسوسناک واقعہ وفاقی دارالحکومت میں ایئر یونیورسٹی اور بحریہ یونیورسٹی کے بلمقابل شاہین چوک میں پیش آیا تھا

ساجد علی اتوار 5 جولائی 2026 21:19

اسلام آباد میں خاتون کو بچانے کے دوران ایئرفورس افسر کی شہادت، فائرنگ ..

اسلام آباد (اُردو پوائنٹ اخبارتازہ ترین۔ 05 جولائی 2026ء) وفاقی دارالحکومت اسلام آباد کے تھانہ مارگلہ کی حدود میں شاہین چوک کے مقام پر خاتون کو زبردستی اغواء کرنے کی کوشش روکنے پر پاک فضائیہ کے گروپ کیپٹن عاصم طارق کو فائرنگ کرکے شہید کرنے والے کیس میں سکیورٹی اداروں کو بڑی کامیابی مل گئی۔ میڈیا رپورٹس کے مطابق شاہین چوک میں سرِعام فائرنگ کرکے ایئر فورس کے سینئر افسر کو قتل کرنے کے بعد ملزم سعد اپنی بائیک سمیت موقع سے فرار ہونے میں کامیاب ہو گیا تھا، تھانہ مارگلہ پولیس نے واقعے کے فوری بعد علاقے کی ناکہ بندی کی اور جدید تکنیکی وسائل کی مدد سے چھاپہ مار کر ملزم سعد کو گرفتار کرلیا، جس سے واردات سے متعلق تفتیش کی جا رہی ہے۔

خیال رہے کہ یہ افسوسناک واقعہ ایئر یونیورسٹی اور بحریہ یونیورسٹی کے بلمقابل شاہین چوک میں پیش آیا تھا، جہاں ملزم سعد ایک لڑکی جس کی شناخت نمرا کے نام سے ہوئی ہے، اس کو زبردستی اپنی موٹرسائیکل پر بٹھا رہا تھا، وہاں سے گزرنے والے پاک فضائیہ کے گروپ کیپٹن عاصم طارق ولد محمد طارق نے جب مداخلت کی اور لڑکی کو بچانے کے لیے بیچ بچاؤ کرانے کی کوشش کی تو ملزم سعد نے طیش میں آ کر پستول سے ان پر فائرنگ کر دی، جس سے وہ موقع پر ہی شہید ہوگئے۔

(جاری ہے)

بتایا جارہا ہے کہ واقعے کے فوراً بعد تھانہ مارگلہ کے ایڈیشنل ایس ایچ او اور ڈیوٹی افسر نے موقع پر پہنچ کر لڑکی کو اپنی تحویل میں لے لیا تھا اور گروپ کیپٹن کی لاش کو پی اے ایف ہسپتال یونٹ ٹو منتقل کیا تھا، اب مرکزی ملزم سعد کی گرفتاری کے بعد پولیس دونوں فریقین کے بیانات اور سی سی ٹی وی فوٹیج کی روشنی میں مقدمے کے تمام قانونی تقاضے پورے کر رہی ہے تاکہ ملزم کو سخت ترین سزا دلائی جا سکے۔