پنجاب یونیورسٹی فٹبال گراؤنڈ میں معمولی بات پر خونی تصادم

فٹبال کھیلتے ہوئے لڑکوں کے درمیان شدید جھگڑا، مکے اور ٹانگیں لگنے سے یونیورسٹی آفیسر کا جوان سال بیٹا سر پر چوٹ آنے کے باعث موقع پر ہی جاں بحق ہوگیا

ساجد علی پیر 6 جولائی 2026 00:15

پنجاب یونیورسٹی فٹبال گراؤنڈ میں معمولی بات پر خونی تصادم

لاہور (اُردو پوائنٹ اخبارتازہ ترین۔ 06 جولائی 2026ء) پنجاب یونیورسٹی کے فٹبال گراؤنڈ میں کھیل کے دوران لڑکوں کے مابین ہونے والے جھگڑے نے ہولناک رخ اختیار کر لیا، جس کے نتیجے میں یونیورسٹی آفیسر کا نوجوان بیٹا سر پر شدید چوٹ لگنے کی وجہ سے موقع پر ہی دم توڑ گیا۔ اطلاعات کے مطابق پنجاب یونیورسٹی کے گیسٹ ہاؤس سے ملحقہ فٹبال گراؤنڈ میں کچھ لڑکے روزمرہ کی طرح فٹبال کھیل رہے تھے کہ کھیل کے دوران اچانک لڑکوں کے درمیان کسی بات پر تلخ کلامی ہوئی جو دیکھتے ہی دیکھتے ایک شدید جھگڑے کی شکل اختیار کرگئی۔

بتایا گیا ہے کہ غصے میں آپے سے باہر ہو کر لڑکوں نے ایک دوسرے پر حملہ کر دیا اور ایک دوسرے کو شدید مکے اور ٹانگیں ماریں، اس تشدد کے دوران وہاں موجود پنجاب یونیورسٹی کے رہائشی نوجوان ریحان گل کے سر پر ایک زوردار اور مہلک چوٹ لگی، جس کے باعث وہ سنبھل نہ سکا اور موقع پر ہی جاں بحق ہو گیا۔

(جاری ہے)

معلوم ہوا ہے کہ اس واقعے میں جاں بحق ہونے والا جواں سالہ لڑکا ریحان گل پنجاب یونیورسٹی کے ہی آفیسر محمد یعقوب کا بیٹا تھا اور وہ یونیورسٹی کیمپس کا ہی رہائشی تھا، نوجوان بیٹے کی اچانک اور دردناک موت کی خبر ملتے ہی والدین اور لواحقین پر قیامت ٹوٹ پڑی۔

بتایا جارہا ہے کہ واقعے کی اطلاع ملتے ہی یونیورسٹی کی سکیورٹی اور پولیس کی بھاری نفری موقع پر پہنچ گئی، جس نے لاش کو تحویل میں لے کر قانونی کارروائی اور پوسٹ مارٹم کے لیے منتقل کردیا۔ اس حوالے سے اسلامی جمعیت طلبا پنجاب یونیورسٹی کا کہنا ہے کہ جامعہ پنجاب میں پیش آنے والے نہایت افسوسناک اور اندوہناک واقعے میں آؤٹ سائیڈرز کی جانب سے ایک یونیورسٹی ملازم کے بیٹے کو مبینہ تشدد کے بعد قتل کر دیا گیا، اسلامی جمعیت طلبہ جامعہ پنجاب اس المناک سانحے پر مرحوم کے اہلِ خانہ اور لواحقین سے دلی تعزیت اور گہرے رنج و غم کا اظہار کرتی ہے، اسلامی جمعیت طلبہ جامعہ پنجاب قانون نافذ کرنے والے اداروں سے مطالبہ کرتی ہے کہ اس واقعے میں ملوث تمام ملزمان کو فوری طور پر گرفتار کرکے قانون کے مطابق سخت سے سخت سزا دی جائے ۔

ترجمان اسلامی جمعیت طلبہ جامعہ پنجاب نے کہا ہے کہ اس کے ساتھ ہی اسلامی جمعیت طلبہ جامعہ پنجاب، جامعہ پنجاب کی انتظامیہ سے یہ سوال کرتی ہے کہ اگر گرمیوں کی تعطیلات کے دوران جامعہ کے اپنے طلبہ و طالبات کے داخلے پر سخت پابندیاں عائد ہیں تو پھر آؤٹ سائیڈرز یونیورسٹی کے احاطے میں کیسے داخل ہوئے؟ اگر فٹبال میچ جاری تھا تو وہاں سکیورٹی کے مناسب اقدامات کیوں نہیں تھے؟ انتظامیہ اس سنگین سکیورٹی غفلت کی فوری وضاحت کرے، ذمہ داران کا تعین کرے ورنہ طلبہ بہت جلد احتجاج کی کال دیں گے۔