پی آئی اے کو پہلے سال میں ہی منافع بخش ادارہ بنادیں گے، عارف حبیب کا دعویٰ

5 سال میں جہازوں کی تعداد 60 کرنے، نئی بھرتیوں اور انجینئرنگ سیکٹر میں بڑی سرمایہ کاری کا اعلان کردیا

ساجد علی پیر 6 جولائی 2026 15:42

پی آئی اے کو پہلے سال میں ہی منافع بخش ادارہ بنادیں گے، عارف حبیب کا ..

کراچی (اُردو پوائنٹ اخبارتازہ ترین۔ 06 جولائی 2026ء) پاکستان کی معروف کاروباری شخصیت اور پی آئی اے کو خریدنے والے عارف حبیب کنسورشیم کے سربراہ عارف حبیب نے دعویٰ کیا ہے کہ نجکاری کے بعد پی آئی اے پہلے ہی سال ایک منافع بخش ادارہ بن جائے گی، ادارے کو تجارتی بنیادوں پر چلایا جائے گا اور صرف وہی روٹس بحال رکھے جائیں گے جو فائدہ مند ہوں گے۔ ایکسپریس کو انٹرویو میں عارف حبیب نے بتایا کہ معاہدے کے تحت پی آئی اے کے 66 فیصد حصص کی ادائیگی کردی گئی ہے، بقیہ 34 فیصد حصص کی رقم اگلے ایک سال کے دوران ادا کی جائے گی، معاہدے کے مطابق ایک سال تک کسی بھی ملازم کو نوکری سے نہیں نکالا جائے گا، اس کے علاوہ پی آئی اے کے سینئر عہدوں پر نئی بھرتیاں شروع کردی گئی ہیں، جو آئندہ ایک سے ڈیڑھ ماہ کے اندر مکمل کرلی جائیں گی۔

(جاری ہے)

ان کا کہنا ہے کہ پی آئی اے کے بیڑے میں اس وقت 19 جہاز موجود ہیں، ان کا ہدف ہے کہ اگلے 5 سالوں میں ان جہازوں کی تعداد بڑھا کر 60 تک پہنچائی جائے، جیسے جیسے جہازوں کی تعداد بڑھے گی، اسی تناسب سے پی آئی اے میں ملازمین کی تعداد میں بھی اضافہ کیا جائے گا، پی آئی اے کے موجودہ بیڑے میں 4 سے 5 جہاز ایسے ہیں جو خراب ہیں، انہیں فوری مرمت کے بعد دوبارہ آپریشنل کرنے کے لیے تیز رفتار اقدامات کیے جا رہے ہیں۔

معروف کاروباری شخصیت نے بتایا کہ ان گراؤنڈڈ جہازوں کی بحالی کے علاوہ اسی سال بیڑے میں 5 نئے جہاز شامل کیے جائیں گے، اس کے بعد ہر سال پی آئی اے کے بیڑے میں مزید 5 نئے طیاروں کا اضافہ کیا جاتا رہے گا، کراچی میں قائم پی آئی اے کی انجینئرنگ سہولت پر خصوصی توجہ دی جائے گی اور اس شعبے کو جدید بنانے کے لیے ایک بڑی سرمایہ کاری کی جائے گی۔