Live Updates

امریکی شہریوں کی اکثریت ایران کیخلاف جنگ کی مخالف

سروے میں 57 فیصد امریکیوں نے ایران پر جنگ مسلط کرنے کے فیصلے کو غلط کہہ دیا

ساجد علی جمعرات 16 جولائی 2026 14:37

واشنگٹن (اُردو پوائنٹ اخبارتازہ ترین۔ 16 جولائی 2026ء) مشرقِ وسطیٰ میں ایران اور امریکہ کے درمیان جاری تصادم اور امریکی حملوں کے بعد خود امریکی عوام نے اپنی حکومت کے اس جنگی فیصلے کو یکسر مسترد کر دیا، عالمی سطح پر معروف پولنگ ادارے 'یو گوو' (YouGov) اور جریدے 'دی اکانومسٹ' کے ایک نئے اور مشترکہ عوامی سروے میں اکثریت کا ماننا ہے کہ ایران پر جنگ مسلط کرنے کا فیصلہ ایک غلطی تھی۔

سروے رپورٹ کے مطابق امریکی عوام کی ایک بہت بڑی اکثریت ایران کے خلاف شروع کی گئی عسکری کارروائیوں اور جنگ کے حق میں نہیں ہے، سروے میں شامل 57 فیصد امریکیوں کا واضح طور پر کہنا ہے کہ ایران پر حملہ کرنے یا جنگ شروع کرنے کا امریکی حکومت کا فیصلہ بالکل غلط تھا، اس کے برعکس محض 27 فیصد امریکیوں نے اپنی حکومت کے اس جنگی فیصلے کی حمایت کی اور اسے درست اقدام قرار دیا۔

(جاری ہے)

NEW Economist/YouGov Jul 10-13: Iran
% who think in hindsight, the decision to go to war in Iran was right | wrong
U.S. adult citizens 27% | 57%
Democrats 5% | 89%
Independents 13% | 65%
Among Republicans
Overall 63% | 16%
MAGA 77% | 5%
Non-MAGA 31% | 51%
(Link in reply) pic.twitter.com/V2zE9fFCpU
— YouGov America (@YouGovAmerica) July 14, 2026

بتایا گیا ہے کہ مشرقِ وسطیٰ کے موجودہ حالات اور دونوں ممالک کی جانب سے سخت بیانات و کارروائیوں کے پیشِ نظر امریکی عوام شدید مایوسی اور خوف کا شکار ہیں، سروے میں لگ بھگ 46 فیصد امریکیوں کا پختہ یقین ہے کہ ایران کے ساتھ شروع ہونے والی یہ ہولناک جنگ اب جلد ختم ہونے والی نہیں ہے بلکہ یہ کم از کم مزید ایک سال یا اس سے بھی زیادہ عرصے تک جاری رہے گی۔

معلوم ہوا ہے کہ رواں سال مارچ کے مہینے میں جب اس جنگ کے حوالے سے سروے کیا گیا تھا تو 20 فیصد امریکیوں کو امید تھی کہ یہ جنگ ایک ماہ کے اندر ختم ہو جائے گی یا یہ ختم ہو چکی ہے، تاہم حالیہ ہولناک فضائی حملوں اور جوابی میزائل برسات کے بعد صورتِ حال یکسر بدل گئی ہے، اب صرف 8 فیصد امریکیوں کو لگتا ہے کہ یہ جنگ ایک ماہ کے اندر ختم ہو سکتی ہے یا ختم ہو چکی ہے، مارچ کے مقابلے میں امید افزا رائے رکھنے والوں کی شرح 20 فیصد سے گر کر محض 8 فیصد رہ گئی ہے، جو اس بات کا ثبوت ہے کہ امریکی عوام جنگ کے طویل اور خونی ہونے کے مہیب سائے واضح طور پر دیکھ رہے ہیں۔