×چیئرمین سینیٹ یوسف رضا گیلانی سے برطانوی پاکستانی باکسر عامر خان کی ملاقات، کھیلوں، نوجوانوں اور سیاست پر تبادلہ خیال

ا* عوام کی خدمت کے لیے سیاست میں آنے کا ارادہ رکھتا ہوں، عامر خان o نوجوانوں کا سیاست میں آنا خوش آئند ہے، چیئرمین سینیٹ

اتوار 19 جولائی 2026 20:55

5اسلام آباد(اُردو پوائنٹ اخبارتازہ ترین - آن لائن۔ 19 جولائی2026ء) چیئرمین سینیٹ سید یوسف رضا گیلانی سے عالمی شہرت یافتہ برطانوی پاکستانی باکسر عامر خان نے ملاقات کی، جس میں کھیلوں کے فروغ، نوجوانوں کی فلاح، اوورسیز پاکستانیوں کے کردار اور ملکی سیاسی صورتحال پر تفصیلی تبادلہ خیال کیا گیا۔ملاقات کے دوران چیئرمین سینیٹ نے کہا کہ عامر خان نے اپنی محنت، صلاحیت اور عزم کے ذریعے عالمی سطح پر پاکستان کا نام روشن کیا ہے۔

انہوں نے کہا کہ کھیل نوجوانوں میں نظم و ضبط، برداشت، ٹیم ورک اور مثبت سوچ کو فروغ دیتے ہیں، جبکہ باصلاحیت نوجوانوں کی سرپرستی اور کھیلوں کے فروغ پر خصوصی توجہ دینا وقت کی اہم ضرورت ہے۔سید یوسف رضا گیلانی نے کہا کہ اوورسیز پاکستانی مختلف شعبوں میں اپنی خدمات کے ذریعے پاکستان کا مثبت تشخص دنیا بھر میں اجاگر کر رہے ہیں۔

(جاری ہے)

انہوں نے بتایا کہ اپنے سیاسی کیریئر کے دوران کھیلوں اور صحت مند سرگرمیوں کے فروغ کو ہمیشہ ترجیح دی ہے۔

اس موقع پر عامر خان نے بتایا کہ کراچی میں ایک جدید باکسنگ اکیڈمی اور اسپورٹس کمپلیکس کے قیام پر غور جاری ہے تاکہ نوجوان کھلاڑیوں کو عالمی معیار کی سہولیات فراہم کی جا سکیں۔ انہوں نے کہا کہ وہ پاکستان پیپلز پارٹی کے ساتھ مل کر کھیلوں کے فروغ کے لیے کام کر رہے ہیں اور عوام کی خدمت کے جذبے کے تحت مستقبل میں سیاست میں آنے کا ارادہ رکھتے ہیں۔چیئرمین سینیٹ نے اس موقع پر کہا کہ باصلاحیت اور باکردار نوجوانوں کا سیاست میں آنا ملک کی ترقی، خوشحالی اور مثبت سیاسی کلچر کے فروغ کے لیے خوش آئند اور مثبت عمل ہے۔