ّکشمیر کی آزادی اور تکمیل پاکستان تک غازی ملت کا مشن جاری رکھیں گے،وزیراعظم آزادکشمیر

جمعرات 30 جولائی 2026 23:16

مظفرآباد(اُردو پوائنٹ اخبارتازہ ترین - آن لائن۔ 30 جولائی2026ء) وزیر اعظم آزاد حکومت ریاست جموں وکشمیرفیصل ممتاز راٹھور نے کہا ہے کہ بانی آزاد حکومت ریاست جموں و کشمیر غازی ملت سردار محمد ابراہیم خان کا مشن مسلمانان کشمیر کو ڈوگرہ راج کی غلامی سے آزادی دلا کران کی امنگوں کی مطابق کشمیر کو پاکستان کا حصہ بنانا تھا۔کشمیر کی آزادی اور تکمیل پاکستان تک غازی ملت کا مشن جاری رکھیں گے۔

کشمیری خون کے آخری قطرے تک آزادی کی جنگ جاری رکھیں گے۔ان خیالات کا اظہار انہوں نے غازی ملت سردار ابراہیم خان کی برسی کے موقع پر خصوصی بیان میں کیا۔انہوں نے کہا کہ غازی ملت نے 1915 سے 2003 تک نشیب وفراز سے بھرپور زندگی گذاری جس میں انہوں نے اعلیٰ تعلیم حاصل کی۔ انہوں نے اصولوں پر کبھی سودے بازی نہیں کی اور اپنے موقف پر ہمیشہ ڈٹے رہے۔

(جاری ہے)

وزیراعظم نے کہا کہ غازی ملت سردار محمد ابراہیم خان کی ذات کو تحریک آزادی کشمیر سے الگ نہیں کیا جا سکتا۔ قوموں کی آزادی کے لیے عسکر ی اور پارلیمانی دونوں قوتوں کا اہم کردار ہوتا ہے جس میں سردار محمد ابراہیم خان کا نام سرفہرست ہے۔تحریک آزادی کشمیر میں جس طرح غازی ملت نے قومی قیادت کا فریضہ سرانجام دیا اور جس ولولہ اور جوش سے عملاً تحریک کا حصہ رہے وہ تاریخ کا ایک درخشاں باب ہے۔

غازی ملت نے ڈوگرہ راج کے خلاف بھرپور تحریک کاآغاز کیا۔ ناگفتہ بہ حالات میں جب مسلمانوں کو اجتماع کے لیے کوئی جگہ میسر نہ تھی تو 19 جولائی 1947 کو سری نگر میں اپنی رہائش گاہ پر قراراد الحاق پاکستان منظور کرا کرکشمیری قوم کی منزل کا تعین کیا۔اس منزل کے حصول کے لیے مقبوضہ جموں وکشمیر کے عوام ہندوستان کے بدترین جبر و استبداد کا مقابلہ کرتے ہوئے قربانیوں کی تاریخ رقم کر رہے ہیں۔ انہوں نے کہا کہ کشمیریوں نے اپنے تشخص اور حق پر نہ سمجھوتہ کیا ہے نہ کریں گے۔